Manera mi a priminti den un articulo anterior, mi ta bai papia over con nos por lanta nos yiunan mas saludabel y asina crea un sociedad cu menos malesa chronico manera cu nos tin awor.
PAKIKO CUMINSA CU NOS MUCHANAN
Muchanan ta manera un spons, nan ta tuma informacion, ideanan y habitonan for di adultonan masha liher mes. Dus ta hopi facil pa hinca den nan e conceptonan di biba saludabel y activo. A keda demonstra cu si bo siña un mucha con pa hiba un bida saludabel, nan lo tene e habitonan aki durante henter nan bida. Cuminsando cerca muchanan tin e beneficio adicional cu nan por juda cambia nos habitonan como adulto tambe, Sr. Bakmeyer ta splica.
UN EHEMPEL FOR DI MI MESUN BIDA
Sr. Bakmeyer ta comparti su mesun experiencia: Tempo un di mi yiunan tabata den derde klas di school basico, e tabata tin un maestra cu tabata pone hopi enfasis riba come y bebe saludabel y hasi actividad fisico. Tur dia e maestra tabata tuma tempo pa siña e muchanan kiko ta cuminda saludabel y kiko no, pakiko nan mester come saludabel y tambe con pa ta mas activo fisicamente. E resultado tabata inmediato. Mi yiu y su compañeronan di klas a bira obsesiona cu e tema di come saludabel. Nan tabata bin cas y bisa nos como mayor cu e cuminda aki y e coi bebe aya cu nos tabata tin den cas, no ta bon pa salud. E muchanan a cuminsa lesa patras di e empakenan di productonan pa wak cuanto gram di sucu e productonan tabata tin y nan mes tabata pidi pa cumpra mas fruta y berdura. Esaki claro a duna nos como mayor un poco dolor di cabes, pasobra ata net nos a cumpra un caha di juice cu e mucha no kier bebe mas awor y porta e la duna nos un poco mas trabao tambe mainta pa traha un wheat wrap cu lechuga y turkey beleg pa su lunch, pero tambe e la duna nos un satisfacion grandi pa wak nos muchanan bezig cu nan salud. Y esei tabata e influencia di 1 juffrouw so!
PENSA CON GRANDI E EFECTO LO TA SI NOS TUR JUDA PA HASI NOS MUCHANAN MAS SALUDABEL
Awor si no ta 1 juffrouw so, pero henter e school ta bezig cu come saludabel y ta ofrece les di salud como parti di e curiculum di school y tambe ta ofrece solamente opcionan saludabel den nan kantine? Awor si nos duna mayornan mas informacion y ayudo concreto, door di duna nan por ehempel un boeki di informacion tocante cuminda, cu informacion di unda pa haña productonan saludabel pero pagabel y con pa traha cumindanan simpel pero cu nutricion pa nan yiunan? Awor si na crechenan nos cuminsa ofrece cumindanan saludabel cu mayornan por cumpra pa nan yiu come na creche como parte di e pakete cu nan ta paga pe? Awor si nos tur limita e tempo cu nos yiunan ta pasa ariba un aparato electronico y zorg pa nan tuma tempo tur dia pa hunga pafor of hasi un deporte? Awor si nos urgi gobierno pa traha fietspaden pa nos yiunan por bai school riba bicicleta tur dia? Awor si nos crea mas facilidadnan den cada bario pa por hasi un actividad fisico cerca di cas mes? Awor si nos bin cu incentivanan pa companianan local y supermercadonan cu ta ofrece productonan saludabel pa nan por ofrece esakinan na un prijs mas abao? Bo ta imagina bo mes con grandi y positivo e efectonan lo ta pa nos yiunan, nos mes y nos comunidad!
CUMINSA CU MI AWOR, HUNTO NOS POR
Esakinan ta solamente un paar di ehempel di cosnan cu nos por hasi. Huntu nos por logra hopi! Ban cuminsa cu mi awor y tuma e reto personal pa bo hasi bo yiu, bo mes y nos comunidad mas saludabel y mas activo. Mi tin hopi mas plan pa nos por logra esaki: na cas, na school, den nos organisacionnan, na trabao. Cu mi experticio y perserverancia y cu bo voto di confianza den ami, Eromil Bakmeyer, nos POR logra cambionan grandi den poco tempo, Sr. Bakmeyer ta termina.