Riba 13 di maart a lansa e prome buki pa pashent den Reino Hulandes, titula ‘E Derechonan di Pashent’, y a inicia un gira den tur centro di Bario aki na Aruba.
Desde luna di mei Fundacion SIKI (Stichting Instituut voor Kennis en Innovatie) y e autor di e buki, mr.dr. Jayburtt Dijkhoff, a bishita tur diaranson anochi diferente bario. Durante e charlanan aki e participantenan por a haya informacion valioso y por a haci diferente pregunta tocante nan derechonan di pashent. Esaki tabata completamente gratis pa asina e comunidad por a haya informacion tocante con pa uza nan derechonan y kico por spera di e sistema di salud.
Awor a yega na e ultimo charla cu lo tuma lugar diaranson awor 5 di juli pa 7or pa 9or di anochi na Centro San Martin (pariba di Parokia di Santa Cruz). Esaki ta bay ta e ultimo charla, ya cu esaki ta marca e final di e gira. E buki ta bai ta obtenibel pa solamente Afl. 35,-.
P’esey no perde e oportunidad aki y invita famia, colega, amistadnan pa bin scucha tocante nan derechonan di pashent. Esaki ta un invitacion pa henter comunidad.
Pa mas informacion por bishita www.sikiaruba.org of Facebook pagina SIKI Aruba.
