Ser’i Teishi: Diadomingo den oranan di anochi a sosode un boksmento riba Green Corridor, na altura di Ser’i Teishi. Chauffeur di un pickup Toyota color blanco cu tabata coriendo hopi iresponsabel a dal contra un Hyundai Tucson, cu ta auto di un agente policial. Mesora a nota cu e chauffeur di e pickup ta bou influencia.
Algun persona cu a sigui e pickup aki a conta cu ta for di caminda di Savaneta caba nan a mir’e pickup coriendo hopi iresponsabel.
E homber tabata basta bou influencia, cu te hasta a bira basta fresco y a usa un vocabulario hopi mahos ora cu e mester a dirigi su mes na e polis di trafico. E homber no kier a sigui orden di polis, cu man duro e polisnan mester a bah’e for di e pickup, e no por a ni para riba su pia y a cay riba caminda, despues di basta luchamento a logra hink’e den e vehiculo di polis.
E homber a wordo transporta mesora pa warda di polis di Santa Cruz, caminda e mester a bay duna cuenta dilanti sub fiscal.
