ORANJESTAD: Diadomingo atardi, Minister di Enseñansa y Deporte Endy Croes a sali pa un biahe di trabou hunto rector di Universidad di Aruba Sra. Viola Heutger y Minister Plenipontenciario na Washington Sra. Joselin Croes na Toronto, Canada. Durante e biahe di trabou na Canada, a firma diferente Memoramdum of Understanding (MoU) cu diferente scol, entre otro, Centennial College, Sheridan College y Ontario Tech University. E acuerdonan aki ta brinda oportunidad na e studiantenan di Aruba pa eherce un estudio na Canada na un tarifa hopi mas abou. Alabes a bishita Seneca College y ta haciendo cu negociacion cu nan. Ademas di esaki, Minister Endy Croes a probecha e biahe di trabou aki pa reuni cu studiante di Aruba cu ta eherciendo un estudio aya. E studiantenan di Aruba a comparti nan experencia di estudio na Canada y a duna algun conseho na esnan interesa pa studia na Canada. Prome cu sali di Canada pa bay otro destinacion, Minister Endy Croes a reuni cu Consul General di Reino Hulandes, Sr. Harman Idema. Pa finalisa, Minister Endy Croes a indica cu e tabata un tremendo biahe di trabou, unda a firma diferente acuerdo cu ta beneficioso pa e studiantenan di Aruba. E mandatario di Enseñansa ta gradici tur esnan cu a contribui pa realisa esaki. Hunto nos ta logra! Pabien Aruba!
