Den Haag – Durante di su bishita di trabao na Zwolle, Minister Plenipotenciario mr. Ady Thijsen a topa cu e studiante Arubiano Krishna Meija. Krishna ta sigiendo un estudio “International Teacher educacion for primary school” na Meppel. E estudio por wordo compara cu un estudio na IPA, pero na Ingles. Krishna alabes ta forma parti di e Plaatselijke Opvangcommissie (POC) di Zwolle. Esaki ta un grupo di studiantenan cu ya caba tin algun aña ta studiando na Zwolle, Enschede y Deventer y ta yuda e mentor di Zwolle, Enschede y Deventer den e programa di “opvang” di e grupo di studiantenan nobo cu ta yega Zwolle.
Den su combersacion, Minister Thijsen a bisa Krishna di ta contento cu tur aña tin studiantenan cu ta pone na tempo liber disponibel na yuda y duna asistencia na e grupo di studiantenan di Aruba cu ta bin Hulanda pa sigi un estudio avansa. ‘Banda di e trabao di e mentor e POC tambe ta sumamente importante pa e studiante cu recien a yega Hulanda sa con pa cana den e ciudad unda e ta bai studia. E preparacion aki ta esencial pa asina e studiante ta bon prepara y concentra bon riba comienso di su estudio,’ asina sr. Thijsen a bisa.
Tambe e mandatario tabata curioso pa tende di Krishna kico asina ta e nesesidad cu ta biba bou di studiantenan Arubiano. Akinan Krishna a indica cu studiantenan tin un nesesidad na mas encuentronan pa nan y tambe pa e POCnan. Banda di encuentro, nan ta desea pa mira si por organisa workshopnan pa nan.
Minister Thijsen a bisa Krishna cu e tambe ta comparti e opinion aki di e studiantenan y mester por mira con y na cual manera Arubahuis por hunga un rol den esaki.
