ORANJESTAD: Recientemente, Minister Endy Croes a reuni cu dr. Ricardo Elio Vargas – Oduardo y dr. Edmundo Josiah di CEMEDAR. CEMEDAR ta specialisa den medicina deportivo, ta prepara pa e atletanan pa nan ta den bon condicion, ta brinda evaluacion y terapia. Minister Endy Croes a indica cu ta importante pa tin e sosten di CEMEDAR pa nos atletanan, pa nan ta den e miho condicion momento cu nan ta sali cu seleccion di Aruba. Durante e reunion CEMEDAR a trece diferente data dilanti cuanto atleta nan ta trata durante henter aña den tur e disciplinanan y atletanan cu ta wordo prepara pa nan federacion cu ta competi riba plataforma internacional. CEMEDAR a expresa e necesidad, door cu nan ta creciendo hopi y nan ta sinti cu e crecemento aki a laga nan man hopi yen, un proposicion pa trece un doctor mas y un nutricionista riba un nivel hopi halto. Entrenamento, preparacion fisico ta bay man den man cu un bon nutricion y siña nos atletanan con pa come ora di prepara. Minister di Deporte ta bay explora e posibilidadnan pa reforsa CEMEDAR den futuro y asina garantisa un bon preparacion pa nos atletanan cu ta representa Aruba den exterior. Concluyendo, Minister Endy Croes a indica cu e tabata un bon reunion y lo keda den contacto estrecho cu CEMEDAR. Den luna di augustus proximo lo bin cu contestanan concreto con Ministerio di Deporte por yuda den nan peticion.