Dia 14 di juni ultimo, tabata Dia Mundial di e Donante di Sanger. Meta di e dia ta pa conscientisa comunidad di e importancia di duna sanger, cu ta algo asina necesario y di vital importancia. Nos tur conoce un hende cu pa un of otro motibo a haya nan mes den un situacion cu nan tin mester di sanger. Nos por a compronde di Sr. Fabian Werleman di Stichting Bloedbank Aruba, cu den e ultimo tempo e cantidad di donante di sanger a bira menos. Tambe, Bloedbank Aruba a informa cu e donantenan ta birando mas grandi. Bloedbank Aruba kier trece un cambio door di encurasha mas hoben cu ta desea di haci acto nobel aki pa yuda otro hende door di bira un donante. Actualmente, Aruba ta conta cu alrededor di 1400 donante cu tres pa cuater biaha pa aña pa duna sanger. Mi mes tin mas di diesdos aña ta duna sanger y cada bes e ta yena mi di satisfaccion pa por yuda un biaha mas y salba un bida. Mi ta encurasha comunidad di Aruba specialmente nos hobennan pa bira un donante. Pa mas informacion por bishita Bloedbank Aruba.