“Masha danki señor Nicolaas, nos ta hopi orguyoso di bo”
ORANJESTAD—Dialuna 12 di juni atardi, Prome Minister Evelyn Wever-Croes a ricibi bishita di señor Quito Nicolaas kende ta disfrutando di vakantie na Aruba pa algun dia. E motibo pa e bishita di señor Nicolas ta pa entrega Prome Minister 2 buki di poema, Argus y Cucuisa Cabisha, als de aloë sluimert.
Sr. Nicolaas, autor di varios obra literario cu a haya reconocimento den literatura, a ricibi un condecoracion real na Hulanda di Rey Willem Alexander pa entre otro su contribucion literario. Tambe, Na Leiden University Press (LUP), señor Nicolas hunto cu Cola Debrot y F.M. Arion, ta keda nomina como e 3 grandinan di Literatura.
Na e edad di 17 aña, señor Quito Nicolaas a bay biba na Hulanda pa studia ciencia politica y ley. Durante su periodo di studiante, el a cuminsa skirbi. Señor Nicolaas semper a keda cu e cultura di Aruba den su curason y na Hulanda durante su condecoracion, a wordo considera como un constructor de brugnan den e relacion entre Aruba y Hulanda y un pilar di e cultura rico di Aruba. Na aña 2020, señor Nicolaas a celebra 40 aniversario como escritor, poeta y critico di buki. Señor Nicolaas a skirbi hopi storia cortico cu a wordo publica den corantnan na Hulanda y Aruba. Tambe, señor Nicolaas a duna lezingnan nacional y internacionan di literatura Arubiano, Antiyano y Caribense. Y asina, tin hopi mas pa menciona di e trayectoria di literatura di señor Quito Nicolaas.
Prome Minister ta gradici señor Nicolaas pa su aporte na literatura, pa su apoyo pa nos cultura na Hulanda y conscientisa nos Arubianonan den tera leu pa semper stima nos cultura. “Un encuentro ameno cu un gran personahe Arubiano. Masha danki señor Nicolaas, nos ta hopi orguyoso di bo”, Prome Minister a expresa.