Parlamentario mr. Gerlien Croes Nos Cuido, Nos deber – Un presente digno pa nos grandinan

Den e ultimo simannan nos Grandinan a haya hopi atencion den medionan di comunicacion y di nos politiconan como resultado di entro otro e situacion preocupante cu ta transcuriendo na SABA. 

Den e ultimo decadanan, nos Grandinan cu nan grandeza y perseverancia a construi e pais aki cu nos ta habita cu orguyo. Cu fervor y perseverancia nan a construi nos nacion pa asina nos tur awe por goza di e frutonan cu cada un di nan logronan a genera pa nos como pais y como individuo ariba nos pais. 

Bida den su curso natural ta prescribi cu for di e legado cu nos por goza di dje awe como herencia, nos lo mester wordo inspira y traha cu curashi pa e presente cu nos Grandinan merece. E creacion di un presente digno mester ta mas cu un meta pa nos, cu tin e deber di carga e cuido di nos grandinan e tempo nos dilanti. E deber husto aki mester traduci su mes den puntonan primordial di cuido di un pais. 

Banda di derecho igual den cuido medico pa nos Grandinan nos lo mester crea hunto oportunidadnan pa nan por sinti nan mes empodera y independiente den actividadnan economico, recreativo y di desaroyo personal. Viviendanan adecua caminda nan cuido diario por wordo brinda y e atención mereci ta ser duna, ta un punto cu no mester ta di discusion y no por wordo poni na peliger bao di ningun circunstancia, y mucho menos pa motibo politico.

Nos como e populacion cu actualmente ta trahando tin e deber di no solamente cumpli cu nos Grandinan, pero tambe inspira nos hubentud creciente pa nan por ta e mihor version di nan mes tur dia. Di e forma aki e curso natural di bida y cuido por sigui wordo carga den e decadanan venidero. E inspiracion aki ta cuminsa y continua diariamente den cada relacionan humano cu nos ta crea cu otro sin importa edad y con nos ta fortalece e norma y balor cu ta traspasa den nos relacion cu otro. Cu e norma y balor aki nos lo sigui crea e pais caminda biba un bida dignamente ta e punto di salida pa cada un di nos cu ta para firme pa humanidad y cada faceta di bida cu e ser humano ta encontra den su trayectoria. 

Laga nos para pa un Comunidad Nobo, un Comunidad Uni.