ORANJESTAD – Awe mainta Corte di Husticia a trata e caso penal contra e hombernan D.R.(24), J.H.B.(18) y S.M.C.(27). Ademas di bendemento di droga a acusa e homber D.R. di posecion di arma di candela. Ta asina cu e hoben J.H.B., tempo cu e tabatin 17 aña, el a wordo gara dos biaha ta bende droga. Tur e bendemento di droga tabata den Sint Maartenstraat na San Nicolas y banda di e veld di basketball.
ARUBA NATIVE por a compronde cu e acusado D.R. na dado momento a bira agresivo riba loke Polis a pone cu el a declara cu no ta e berdad. El a lanta para tur rabia y di biaha un miembro di KIA a actua y pone na su lugar
BENDE DROGA
Hues a cuminsa cu J.H.B. El a mustra cu dia 25 November 2021, Polis a detene J.H.B. ta bende droga. Despues a lag’e liber y na Januari 2023 ta bolbe gar’e ta bende.
Hues a puntra J.H.B. si e promer detencion no tabata un les. Segun J.H.B. awor el a siña su les. Hues a sigui cu S.M.C., kende a bisa cu e no tabata bende na 2016. El a bisa cu na 2020, tempo di Covid, el a cuminsa bende. El a desmenti di tabatin droga cun’e ora di detencion.
Hues a mustra cu D.R., apenas a sali liber na October 2022 for di KIA, cu el a cuminsa bende. Pa loke ta e arma di candela, D.R. a bisa Hues cu el a core un trip di algun dia y a haya un arma den auto y el a haci un video cun’e. Segun D.R., e no sa di kende e arma ta.
Hues a bisa cu e team anti droga a constata movecionnan sospechoso den Sint Maartenstraat na San Nicolas. Nan a mira cu diferente hende tabata bay na un cas. Nan a reconoce varios adicto ta bay na e cas aki caminda S.M.C. y D.R. tabata keda.
CONFISCA CANTIDAD DI DROGA
Dia 25 November 2022, e team a haci investigacion na e cas. E momento ey S.M.C. no tabata tey. A haya 106 gram di cocaina y 365 gram di marihuana. Tambe a haya 989 florin y 141 dollar. Tur esaki a keda confisca y D.R. a keda deteni. D.R. a bisa e agentenan cu e placa ta di droga. Den I Phone di D.R., e agentenan a mira un video cu 4 hende den un auto. E video tabata di October 2022, caminda a mira D.R. cu un arma di candela den man. Hues a bisa cu un di esnan den e auto, un tal T., a bisa cu e arma ta di D.R. y cu D.R. a bis’e bay busca e arma p’e unda e tabatin esaki scondi. E otronan no kier a bisa nada. Segun D.R., e no sa di kende e arma ta. Hues a sigui mustra cu Polis a bay scucha cel di S.M.C. y a haya sa cu S.M.C. a bay biba otro caminda. A detene S.M.C. y un dama V.B. A confisca un etui cu mas cu 1000 florin. Ta asina cu S.M.C. a admiti di tabata bende droga pa tres aña. El a bisa cu el a cuminsa bende tempo di Covid pa mantene su mes y su yiu. E ta desmenti di tabata bende for di 2016.
Hues a mustra cu e agentenan anti droga a mira cu J.H.B. tabata bay na e cas den Sint Maartenstraat y despues ta bay banda di e veld di basketball. Eynan e tabata bende droga. Dia 26 November 2022, e agentenan a detene. E tabatin 259 florin cun’e, cual a keda confisca. A lag’e bay y na Januari 2023 a bay busca J.H.B. pa e duna un declaracion. E agentenan a constata cu J.H.B. tabata banda di e cas na Sint Maartenstraat y a pasa un adicto un sakito. A bolbe detene.
ACUSADO AGRESIVO
Hues a lesa e raport di e agentenan anti droga loke D.R. a declara. D.R. a reacciona ora Hues a bisa cu na Polis, D.R. a bisa cu e ta gana 1000 florin pa dia y cu ora e sali e lo bolbe haci mesun cos. D.R. hopi emociona, a bisa Hues cu e agentenan ey tin rabia riba dje for di pasado. Hues a bisa cu e ta haya e declaracion straño. D.R. a bira emociona y a bisa palabranan menos bunita cu e agentenan di Polis den pasado a bati’e. El a hasta lanta para pa expresa su mes y di biaha un miembro di KIA a bay riba dje, gar’e y bis’e pa sinta. Hues a bisa D.R. cu e ta compronde cu D.R. ta emociona pero e mester comporta su mes den Corte. Hues a mustra cu D.R. tin diferente condena caba. Ta parce cu D.R. ta drenta y sali KIA. D.R. a bisa Hues cu e kier un chens pa e drecha su bida y cu e ta hopi cansa di KIA.
FISCAL
Fiscal ta haya legalmente proba tur e acusacionnan contra e trio. Fiscal a bisa cu apenas D.R. a sali na October 2022 di KIA, cu e tabata na un cas ta bende droga. Tabatin un video di dje cu cantidad di droga. Esey a pone e team anti droga bay observa na November 2022 y a mira hopi movecion na un cas na Sint Maartenstraat. Dia 25 November 2022 a tene e accion di investigacion y a mira hopi hende core bay pero a detene D.R. y J.H.B. Door cu J.H.B. tabata menor di edad, a lag’e liber pero di biaha J.H.B. a cuminsa bende atrobe. Dia 21 Januari 2023 el a bolbe wordo deteni. Fiscal a bisa cu tin testigonan a bisa cu nan ta cumpra serca J.H.B. Fiscal a bisa cu a calcula promer cu J.H.B. tabata bende durante 1 aña pero door cu despues cu el a sali y bolbe bende, ta calcula cu e tabata bende algo mas cu 1 aña.
EXIGI CASTIGO DI PRISON
Fiscal a bisa cu e trio aki tabata probecha di e miseria di e adictonan na droga. Esaki ta crea criminalidad pasobra adictonan ta bay horta pa yega na placa pa por sigui cumpra droga. Fiscal a bisa cu e ta spera cu awor si J.H.B. a siña su les. El a bisa cu mirando cu e tempo ey J.H.B. tabata menor di edad, e mester exigi castigo hubenil. Fiscal a exigi pa J.H.B. 360 dia di prison, di cual 120 dia ta condicional y 2 aña di prueba bou guia di Reclasering.
Pa S.M.C., Fiscal a bisa cu e ta duna e beneficio di duda. Envez di 2016 pa 2022 cu testigonan a bisa, e ta calcula di 2019 pa 2022. Fiscal a sigui bisa cu e ta haya proba S.M.C. di posecion di 106 gram di cocaina y 365 gram di marihuana na e cas den Sint Maartenstraat. Fiscal a bisa cu apesar cu S.M.C. a core bay pero e tabata den e cas ta bende. El a exigi pa S.M.C., 36 luna di prison, kitando e tempo cu e ta sera den KIA.
Pa D.R., Fiscal a bisa cu apenas el a sali for di KIA na October 2022, el a bolbe cuminsa bende. Tin hendenan a bisa cu nan a cumpra na October 2022 for di D.R. Fiscal ta calcula cu D.R. tabata bende mas o menos 1 luna y mey y tabata den posecion di 106 gram di cocaina y 365 gram di marihuana mescos cu S.M.C. Tambe Fiscal a mustra cu D.R. a filma su mes cu un arma di candela dia 10 October 2022. Pa cu e castigo, Fiscal a bisa cu door cu D.R. kier haya ayudo pa cambia, el a exigi 30 luna di prison di cual 6 luna ta condicional cu 2 aña di prueba y bou guia di Reclasering.
Fiscal a exigi tambe pa confisca tur e placanan cu e agentenan di droga a haya y tambe pa destrui tur e droganan y tur otro cosnan relacion cu droga. E auto cu D.R. ta bisa cu Polis a bay cun’e, lo wordo debolbe na su doño cu ta e tanta di D.R.
Despues di a scucha e abogadonan, Hues a sera tratamento di e caso y a bisa cu 7 Juli 2023 lo tin sentencia.