ORANJESTAD, 16 Juni, 2023 – Aruba Hotel &Tourism Association a introduci un programa di premiacion pa reconoce companianan responsabel cu ta priorisa mehoracion di nos comunidad.
Un panel di hurado independiente, consistiendo di 5 persona profesional, a revisa 37 aplicacion impresionante di compania cu ta dedica na crea impacto positivo den comunidad y no solamente na nan meta financiero.
E hurado a crea criteria oficial pa skohe un ganador den 4 pilar di sostenibilidad, y asina reconoce nan esfuersonan excepcional na bienestar di nos isla:
- Bucuti & Tara Beach Resort a gana AHATA Impact Award pa “Proteccion di Medio Ambiente”.
- Divi & Tamarijn Beach Resort a gana AHATA Impact Award pa “Inversion den caridad”.
- Bodegas Papiamento a gana AHATA Impact Award como “Campion pa Cultura”.
- La Cabana Beach Resort a gana AHATA Impact Award pa “Desaroya Bienester di Empleado”.
Durante un Asamblea General di miembro, Presidente y CEO di AHATA, Tisa LaSorte, a entrega un obra di arte di artista Gilbert Senchi, na e 4 ganadornan den presencia di ehecutivonan den industria di turismo y Minister di Turismo y Salubridad Publico, Sr. Dangui Oduber.
AHATA ta orguyoso di e dedicacion immenso di e ganadornan y ta gradici tur compania cu ta inclui metanan di sostenibilidad den nan plan anual y ta tuma accion pa contribui na cambio positivo den nos comunidad. Cu e exitoso programa di AHATA Impact Award, e asociacion di turismo a logra un meta principal pa apoya comercio cu tin maneho sostenibel y ta spera di por inspira mas participacion y dedicacion di munco comercial na practicanan di impacto.
E panel di hurado, cu a dedica nan tempo y conocemento na e programa di premiacion, a consisti di: Daniel Tecklenborg – Director di CEDE, Rosabelle Illes – PHD den Psicologia y Miembro di Facultad di Universidad di Aruba, Jan Noordzij – Director di Advance Human Resource Services, Francielle Laclé – Advisor di Desaroyo Sostenibel, y Ray-Anne Hernandez, Director di UNOCA.
AHATA ta gradici e sponsors di e evento ceremonial: Balashi Brewery, Elite Productions, The Ritz-Carlton, Aruba, y BEE4 Consultancy and Events.
Pa mas informacion di e esfuersonan sostenibel di cada 37 nominacion pa AHATA Impact Award 2023, bishita www.ahata.com.
