E Fundacion Union di Tipiconan Rubiano, conoci como Fundacion UTR, diadomingo 28 di mei a organisa e di tres ‘Fiesta Tipico den Bario’. Durante cada Fiesta Tipico den Bario, Gobierno ta duna un reconocimento na esnan cu ta sostene, promove y mantene nos folklore bibo den nos barionan. Prome Minister Evelyn Wever-Croes, den e di tres fiesta den bario aki tawatin e honor pa den nomber di Minister di Cultura Xiomara Maduro, reconoce dos musico, señora Mathilde Paskel-Boekhoudt y señor Esteban Banchi Koolman, pa nan contribucion pa mantene y promove nos musica cultural.
Señora Mathilde Paskel-Boekhoudt a nace na Aruba dia 4 di mei 1939 y tin actualmente e bunita edad di 84 aña. Señora Mathilde ta e di ocho yiu di e 15 yiunan di señor Alphonso Pedro Boekhoudt y señora Mathilde Thiel, ambos den feliz memoria.
Señora Mathilde a lanta den un famia di musico. Su Tata tabata doño di Caha di Orgel “El Maldito Prufiado” y tabata toca wiri, fio y tambu. E otro rumannan tabata toca diferente instrument por ehempel e conocido señor Alphonso (Buchi) Boekhoudt cu tabata traha Caha di Orgel y pone piesa y e ruman señor Francisco (Choncho) Boekhoudt, dfm, cu tambe a pone piesa pa Caha di Orgel y cu tabata graba su CDnan den un estilo diferente acompaña cu varios instrument.
Señora Mathilde a casa cu señor Lino Fortunato Paskel, dfm, na aña 1960 y a wordo bendiciona cu tres yiu muhe. Señora Mathilde semper tabata tin e deseo pa por tin su propio grupo di baile Folklorico acompaña cu Caha di Orgel. Na aña 1983 su soño a bira realidad y a lanta e grupo di baile bao nomber di “Flor di Antaño” y na aña 1984 a cumpra su propio Caha di Orgel “Melodia di Antaño” di cual e nombernan a ser escogi pa señor Julio Maduro, dfm. E grupo tabata consisti di famia completo y algun amistad y a sigui te cu e di tres generacion.
Pa 28 aña e grupo a existi exitosamente presentando na diferente actividad cultural y turistico. Den transcurso di e añanan a coopera cu e.o. hopi club, scol y festival. Fuera di ta musico, señora Mathilde tabata un costurera famoso na Savaneta. El a cose hopi trahe pa carnaval, bruid, Miss Universe Aruba y Miss Mundo Aruba. E mes a cose tur e bisti y trahenan di baile pa su grupo. Te awe apesar di su edad avansa, señora Mathilde ta activo ainda cu tocamento di Caha di Orgel pa diferente evento.
Prome Minsiter, den nomber di Minister Xiomara Maduro, Gobierno di Aruba y di pueblo di Aruba ta gradici Señora Mathilde Paskel-Boekhoudt, pa sostene y promove nos musica cultural y pa su gran aporte na musica di Caha di Orgel. Masha pabien.