Dia 10 di mei 2023, Departamento di Mucha y Hoben (DMH) a tene un atardi di kibra cabes pa e cabesante- y maestronan di scol preparatorio (kleuterscholen) di DPS, SKOA, SPCOA na Aruba. Un total di 15 maestro di e 27 scolnan, cu a haya presentacion di DMH den maart, a mustra interes y a participa na e rondanan aki, tabata presente.
E meta di atardi aki tabata pa a base di nan experiencia, experticio y conocemento, inventarisa e caracteristicanan cu e muchanan rond di 4 aña mester/ta domina, basa riba e 5 areanan di desaroyo, ora nan drenta scol preparatorio/primario. E 5 areanan di desaroyo di mucha ta e areanan cognitivo, social emocional, adaptivo, fisico y comunicativo.
Den un siguiente sesion e cabesante/maestranan aki lo delinea/crea e areanan/factornan cu ta relevante pa tin den un kindvolgsysteem/kinddossier nacional. E cabesantenan/maestronan lo indica kico pa nan ta importante pa tin como e indicadornan.
Banda di esaki, lo delinea/crea un proceso nacional/uniforme di traspaso oficial (warme overdracht) di centro di cuido di mucha/cas pa scol preparatorio. Akinan nan lo indica kico ta importante/relevante pa tene cuenta cu ne den e proceso di traspaso oficial, p’e tuma lugar efectivamente y eficientemente na bienestar di e mucha.
Di e manera aki DMH kier yega na un sistema Nacional, pa loke ta trata e desaroyo como traspaso entre centro di cuido di mucha pa scol preparatorio (kleuteronderwijs) na Aruba, cu lo beneficia e desaroyo di nos muchanan, desde un edad trempan.
