“Ta basta. Aruba no por sigui acepta tanto blunder, eror y falta di capacidad di un minister”, asina e parlamentario independiente, mr. dr. Ryçond Santos do Nascimento, a vocifera den fin di siman. E ta referi na Minister Ursell Arends, un politico cu a priminti den campaña cu “nos no ta nan” y cu awor ta resulta cu berdad Raiz no ta mescos cu MEP sino mas bien ta pio cu MEP. Tur speransa cu e pueblo votado tabatin den e partido y e minister, a bay perdi debi na su incompetencia.
Pretpakket
Minister Ursell Arends a demostra claramente cu hasta si dun’e un “pretpakket”, cuanto daño e por haci. Asina por ehempel a inventa un Ministerio di Naturalesa p’e, cu basicamente ta un cartera bashi y sin sentido den gobernacion. A dun’e transporte y den realidad e no a haci nada cu ne. Te dia di awe e minister no a yega Arubus, pa menciona con e tin mas di un aña caba na poder y ni su departamentonan no a yega pa conoce. Con bo por tin of papia di un maneho riba transporte si bo mes no tin un idea di kico ta come y bebe den Arubus? Ademas tin necesidad pa atencion riba maneho relaciona cu nos taxistanan. Y no papia mes di e caos cu el a crea cu Serlimar y e ceramento di e dump na Parkietenbos. Y awor tin un desaster mas, esta e reintroduccion di AruParking. Banda di esey a kita maneho di nos grandinan for di bou di salubridad publico y a pas’e pa Ursell y kico e ta haci? Kier caba awo cu SABA, e fundacion cu ta maneha e cas di cuido pa nos grandinan. Pues, e realidad ta cu unda e pone su man, cos ta bay robes.
Integridad?
Tambe Ursell a tuma over e cartera di Integridad for di Evelyn Wever-Croes pa aparenta cu e ta integro. Awor, con bo por ta integro si den bo mesun gabinete tin un minister di Deporte cu un interes miyonario den Lotto pa Deporte? Awor Ministerio Publico ta investigando ex-Minister Plenipotenciario Guilfred Besaril y ta investigando ex-Minister Eddie Briesen. Tur esaki mientras Ursell ta den funcion keto bay. Masha rato e mester a kita sosten na e gabinete pasobra a demostra cu e coalicion no ta integro y mas bien ta fix nan mes y nan amigonan. E minister plenipotenciario hasta a cumpra wieg y cama di baby pa su yiu cu creditcard di Gobierno di Aruba y Ursell ta sostene e coalicion keto bay. Esaki ta haci e complice na tur e maldadnan cometi pa MEP y su candidatonan.
Aruparking ta mal organisa
Minister Ursell Arends a haya mas di un aña di tempo pa prepara reintroduccion di AruParking. Su partner den coalicion a demonisa AruParking tempo nan tabata den oposicion pasobra nan sa cu e no ta algo popular, pero awo a pusha Ursell Arends cu e batata cayente. Manera semper el a tum’e cu brasa habri y awe Minister Ursell Arends ta mal pega cu e compania, cu e leynan necesario pa regula nan competencia y cu pueblo cu mester acepta e cambio. Ta bisto cu for di MEP mes nan ta sacando pia tur dia pa Ursell Arends trompica, aunke cu el a permiti reintroduccion di AruParking sin cu nan ta debidamente prepara p’e. Mashinnan daña pero cambio di ley cu no ta cla ainda, banda di trahadonan cu aparentemente no tin autoridad legal pa controla y duna multa, awo ta haci cu derecho di existencia di e compania ta den wega. Y pio ainda, varios negoshi a haya nan ta dal porta cera pa motibo cu caya grandi ta bashi caba y ta premira cu e reintroduccion di AruParking lo bira e clabo riba nan cah’i morto.
SABA ta un bon ehempel di mal maneho
Aunke cu SABA por haci un miho trabou den su mesun administracion y tumamento di decision, toch no por kita afo cu e minister tin un plan pa caba cu nan y cu nos grandinan. Door di a manda Bureau Rampenbestrijding Aruba (BRA) haci un inval den cushina di e fundacion, ta demostra claramente cu e plan ta pa cera SABA of pa core cu e director di un manera of otro. Pues en bes cu e Minister di nos Grandinan mester ta trahando duro pa busca solucion con ta yega na mas cama pa cuida nos grandinan, ta riba un trip di “bula cabes” di e director y e directiva di e fundacion. Ken ta sali victima di e wega di poder aki? Nos grandinan, cu no por yuda nan mes y ta depende di un cas di cuido pa por biba un bida mas normal posibel.
SABA ta lucha pa existi
E forma con e minister ta haciendo tur lo posibel y cu ayudo di MEP, pa caba cu e fundacion, ta haci cu SABA mester dedica tur su tempo na un lucha pa por sigui existi, en bes di ta dedica tempo na nos grandinan. E trahadonan ta biba den un incertidumbre pasobra no tin garantia di salario y pio di nan vakantieuitkering cu mester haya paga den luna di juni. Gobierno ta bisa di tin placa aparta pa paga nan, pero e fundacion mes no tin niun siguransa ainda.
A bira ora pa retira
Si tabata existi un Parlamento independiente na Aruba, ta for di masha dia caba lo a pasa un mocion di desconfiansa y baha e minister for di su puesto. Pero como cu e parlamentarionan mester sostene e coalicion actual pa garantisa nan salario tur fin di luna, ta haci cu ningun tin e curashi pa yama e minister aden y dun’e su carta di retiro. No ta keda nada otro awo pa e mes tuma honor na su mes y pidi retiro. E mes mester por ripara cu nada cu e haci no ta sali e bon, kisas pa su falta di capacidad pa resolve problema of pasobra su mesun partner den coalicion ta saca pia constantemente pa e trompica.
Raiz nunca mas
“Pueblo a kere den dje y a dun’e un chens. El a benta e chens ey afo y awo ta ora pa e bay su cas”, asina Ryçond Santos do Nascimento ta opina. E ta kere cu pueblo no por wanta mas sla di e gobierno MEP/RAIZ y specificamente di e minister aki. E kier cobra pa tira sushi, pa procesa sushi, pa parkeer bo auto, pa tur cos e kier mas placa. E ta pensa cu e por goberna e pais manera un negoshi y esey definitivamente no ta bay asina. Den negoshi bo por scoge ken ta bira bo cliente, pero den gobierno bo no tin e opcion ey: ta henter pueblo ta bo cliente. Y pueblo ta confia cu a vota pa un politico cu lo ta capaz pa maneha e pais na drechi, pero a haya sa awo cu Minister Ursell Arends ta totalmente incompetente y incapaz pa hiba nos pais na e siguiente nivel di crecemento.