Partido MEP a tuma nota di un atake hopi baho y falso di Armand Hessels riba Lider di MEP Evelyn Wever-Croes. Hessels a haya ta bon pa na un forma totalmente sin respet, ataca Lider di MEP y su tata Hendrik Croes, basa riba puro mentira!
Lider di MEP hunto cu partido MEP ta esnan cu den historia di pais Aruba a haci enormemente hopi pa logra mas integridad na Aruba. Ta bon pa recorda Hessels di tur esaki:
1) Lider di MEP a institui Bureau Integriteit Aruba, algo unico na Aruba y den Reino.
2) Pa companianan estatal a introduci Corporate Governance Code
3) A traves di e Comision pa fortifica nos sistema democratico, cu nos lider a institui, ta traha riba independisacion di nos institutonan halto di estado
4) Introduccion di ombudsman
5) Ley di screening y integridad di ministernan
6) Ley di financiamento di partidonan politico
7) Introduccion di e wever-croes-norm
8) Gobierno a contribui financieramente cu 100 mil florin na e “National Integrity Scan” cu a wordo haci pa prome biaha na Aruba, hunto cu Saxion University, Universidad di Aruba y Hessels mes; y a base di e recomendacionnan awor Minister di Integridad Ursell Arends ta trahando un strategia di integridad
Esakinan ta apenas algun di e pasonan grandi tuma riba tereno di integridad desde cu Evelyn Wever-Croes a bira minister president, y cu ta logronan di su propio esfuerso. Nunca antes den historia di nos pais, asina tanto a wordo haci riba e tereno aki. Pues e atakenan di Hessels sigur no ta na su lugar!
Finalmente ta tristo pa mira un hende homber di edad respeta cu Hessels ta, ofende y falta respet na un hende muhe, nos lider di partido. Partido MEP ta rechasa e abuso aki contra nos lider. Ademas, Hessels a lastra falsamente Hendrik Croes, cu un cantidad di mentira. Hendrik Croes ta un persona respeta den comunidad, abogado di profesion pa tempo largo, voluntario den diferente organisacion y iglesia, y sigur un hende homber cu nunca a haya su mes envolvi cu maltrato di hende muhe.
Partido MEP pa medio di e comunicado aki ta sali na defensa di su lider y lo haci esey contra TUR cu inhustamente kier desacredita nos lider, cu ta e votegetter di nos pais! Ta bira tempo pa hendenan hiba debate SIN falta respet y SIN recuri na mentira. Esey ta integridad di berdad!