Diaranson ultimo, lider di Partido di Pueblo Arubano (AVP) a bishita John Wesley College pa conoce e situacion di e cierre di e scol secundario y pa scucha e studiantenan nan preocupacion pa cu e cierre aki. Diahuebs mainta Eman a duna un declaracion na prensa den cual ta urgi y responsabilisa Gabinete Wever-Croes pa e destino di e instituto educativo na San Nicolas, su personal y studiantenan.
“Nos a keda hopi preocupa,” asina Eman a bisa. “E scol ta historico den hopi sentido. Su balor pa San Nicolas ta sumamente grandi.” E politico di oposicion a comenta na media cu ta un cantidad enorme di ciudadano prominente, te hasta internacionalmente conoci, a gradua di e scol aki. Como ehempel el a duna Sarah Wescott, kende dia el a bishita Aruba como Promer Minister, nos a pone riba su ruta di bishita pa pasa na e scol y recorda parti di su hubentud y experiencia eynan. “E scol aki tin un balor hopi grandi,” Eman a expresa.
Adicionalmente, John Wesley ta un nomber cu tin un nificacion grandi den e religion Methodista, cu ta uno cu presencia prominente den San Nicolas y na Aruba. John Wesley ta fundador di e denominacion cristian Methodismo, Eman a splica. Tambe e lider di oposicion a accentua cu John Wesley ta tambe author di letranan di Fe cu mas di 200 anja ta inspira den iglesianan tur rond di mundo.
Eman: “Mucha y docentenan ta hopi decepciona cu e scol ta bay cera. E ta mas cu un scol, e ta un cas y un extension di nan famia. Lamentablemente ta mira cu a tuma un decision sin tene esunnan involucra na cuenta.” Eman ta accentua cu na momentonan asina, gobierno tin un responsabilidad pa trece un dialogo den comunidad pa wak con por reuni alternativanan, apoyo y cooperacion pa evita e cierre di e scol. “Hasta lo por stimula mas fundacion pa traha hunto”.
Locual mr. Mike Eman ta mira como un efecto hopi negativo pa e cantidad di studiantenan cu e scol tin ta cu aña pasa a aumenta e tarifa di schoolgeld di 350 florin pa 650 florin, mientras cu algun meter leu bo ta haya un Abraham de Veerschool cu ta cobra keto bay 350 florin. Naturalmente, esaki ta pone John Wesley College den un posicion dificil di competencia caminda cu mayor ta bay scoge pa un scol mas menos costoso. Locual ta logico den un un tempo asina dificil.
Eman hunto cu coleganan di partido, ing Mike de Meza y Clifford Heyliger a para dilanti di e scol diahuebs mainta pa haci un peticion publico na gobierno, aunke a laga sa bon cla cu nan esfuersonan no lo keda te ey. “Ta spera cu den algun dia lo tin un cambio di actitud,” Eman a expresa. El a pidi pa haci mescos cu AVP a haci tempo cu nan tabata den gobierno, ora cu a renoba La Salle College, Dominicus College, Filomena College, Teresita College y John Wesley College mes y mucho mas; edificionan historico y monumental den cual a inverti miyones teniendo cuenta cu e ser humano y no djis sacando rekensommetjes.
“E cifranan cu gobierno ta hunga cu ne y e realidad penoso cu nos pueblo ta biba awe a bati na porta di John Wesley. E ta un sintoma di un mentalidad di keda traspasa cuenta pa e pueblo paga. Consecuencia ta cu awe tin redoblacion di BBO, ta kita remedi, tarifa halto di awa y coriente, pasobra gobierno tin otro prioridad,” asina Eman a bisa.
Pa AVP, loke ta sosode aki ta totalmente inaceptabel. Ta responsabilidad di Gabinete Wever-Croes II pa trece partidonan hunto y wak unda por yuda pa e scol aki por keda existi pasobra San Nicolas no por permiti cu mas cos ta cera pariba. “E señal aki ta uno sumamente negativo pa San Nicolas y su pueblo,” asina Eman a finalisa bisando. E lider di oposicion a finalisa bisando cu “nos lo lucha contra cierre di John Wesley College, nos a priminti e studianten cu nos lo “put up a fight” pa nan school keda habri. E lucha lo continua te ora Gabinete Wever Croes realisa cu esaki NO POR !!