Tin un dicho ta bisa cu “ora cu un hende ta na punto di bay for di e mundo aki su spirito ta cuminsa cana”. Esey siguramente ta e caso cu partido AVP, caminda un di su fiel compinchinan, esta e pensionado Leslie Merkies a haya ta bon di ataca e militancia di MEP yamando nan pa fanatico ciego y masokista politico. Ta increibel con un homber grandi di edad ta wordo maluza door di lider di AVP pa bay asina leu di insulta esnan cu ta sacrifica y ta trahando hopi duro pa salba e pais aki for di man di esnan cu a destrui e pais aki financieramente, economicamente y socialmente. Y pa no papia mes di e ola di atraco y criminalidad cu ta azotando nos pais tambe severamente y cu ta inherente na e gobierno aki.
Malgasta placa di pueblo
Den su atake di locura Leslie Merkies kier a bolbe manipula mente di pueblo alegando cu e gobierno di MEP durante 8 aña no a haci nada pa crea un desaroyo positivo den e pais aki. Hecho ta cu na momento cu MEP a bandona gobernacion na final di 2009, a ser laga atras un suma astronomico di 970 miyon florin den caha di gobierno y cual suma partido AVP den un tempo record a derocha esaki na su antoho, caminda nan a emplea un gran cantidad di pensionado compinchi di AVP cu salarionan astronomico, coordinadornan incapacita cu solamente AVP-diploma, a distribi placa den huur di edificio di famianan liga na AVP, viahenan di ministronan rond mundo y tambe organisando conferencianan berde cu invitadonan cu a bin come y bebe riba custia di pueblo. Anto riba dje e AVP-istanan tin e curashi di declara cu nan a haya e caha di gobierno blo bashi. Y siguramente Leslie Merkies tambe ta un di nan cu a goza di un parti di e 970 miyon aki cu gobierno di MEP a laga atras y kende awor sin ningun tiki di berguensa kier papia di moralidad. Bo mester ta un persona inmoral ora cu hobennan kendenan a caba scol no por haya trabao y meramente pa motibo cu e gobierno abusado di AVP a laga un gran cantidad di pensionado cu 3 of 4 pensioen ocupa funcionnan cu mester a bay pa e hobennan.
AVP a desgracia pais Aruba
Ta increibel cu te ainda Leslie Merkies no ta consciente den ki desgracia su gobierno di AVP a hinca nos pais aden, caminda nos tur ta pagando 230 miyon florin na interes tur aña y cual ta ekivalente na 600 mil florin pa dia! E interes astronomico aki ta como consecuencia di e aumento di e debe nacional door di AVP, esta for di 2.2 biyon florin na 2009 te na 4 biyon florin na 2016 y esaki sin conta acerca e 2 biyon florin na e proyectonan PPP. Na kico e gobierno di AVP a malgasta e 1.8 biyon florin extra aki durante 7 aña siendo cu nan a hereda 970 miyon florin ora cu nan a asumi gobernacion na 2009? Pues den total 2.7 biyon florin extra y cu te ainda no a haya un splicacion debido for di AVP-istanan raha manera Leslie Merkies!
Cu hopi orguyo falso
Y ta parce cu Leslie Merkies den su ignorancia no a lesa e ultimo rapport di CAFT caminda a ser treci padilanti cu lo dura 27 aña prome cu finansa publico lo por yega bek na e nivel di debe cu gobierno di MEP a laga atras na 2009. E gobierno di AVP cu Leslie Merkies ta defende ciegamente “cu hopi orguyo falso” a crea debe y mas debe pa nos yiu y nietonan paga. Hecho ta cu na 2009 nos pais tabata goza ainda di un rating di A- for di instancianan internacional manera Fitch y Standard & Poor’s y pa awe na 2017 nos a wordo downgraded te BBB- y sin crecemento economico durante e ultimo 3 añanan.
Finalmente, e mensahe di MEP ta, cu si tin un gobierno cu ta practica diariamente corupcion, nepotismo, hortamento di tereno di pueblo, intransparencia y clientelismo, esey ta partido AVP. Y pa Leslie Merkies e mensahe:”Wiens brood men eet, diens brood men spreekt”.