ORANJESTAD – Durante su bishita na Hulanda, Prome Minister Evelyn Wever-Croes hunto cu Minister Plenipotenciario Ady Thijsen a reuni na Arubahuis cu professor Hoogers di Universidad di Groningen. Professor Hoogers ta duna les di ley constitucional y na varios ocacion a asisti paisnan di Hulandes den Caribe riba temanan cu tin di haber cu Reino y Statuut.
Prome Minister a indica cu den pasado Professor Hoogers a asisti Aruba, Parlamento y Gobierno cu hopi bon conseho y pa e motibo aki, mirando cu tin varios tema di Reino riba mesa, a tuma e oportunidad di reuni cu ne. Durante e reunion a toca varios tema, pero specialmente e tema di ley di Raft cu Hulanda ta poniendo riba mesa como condicion. Tambe a toca e tema di “geschillen regeling”, cu ta e ley cu ta atende ora tin disputa entre paisnan den Reino. Varios otro Rijkswet tambe tabata temanan di combersacion.
“E reunion tabata uno positivo. Aruba lo sigui conta cu asistencia di Professor Hoogers pa asina yega na solucionnan rapido cu Hulanda”, Prome Minister a expresa.