ORANJESTAD – Como parti di e programa cu BoBario di Ministerio di Asuntonan General ta ehecutando den cooperacion cu Comite Olimpico Internacional, ta construyendo varios mini cancha di futbol cu yerba artificial na sedenan social di diferente bario. Esun mas reciente cu a cuminsa traha riba dje ta na Centro di Bario Dakota den presencia di Prome Minister Mike Eman, directiva di CB Dakota, ekipo di futbol infantil y nan mayornan. Presente tambe tabata Parlamentario Marlon Sneek y Sr. Jubert Richardson na kende e mini veld ta dedica y lo carga su nomber.
Premier Eman a sinti e alegria entre esnan presente, particularmente e muchanan, paso e facilidad di yerba artificial, aunke ta mini, ta un soño di nan cu ta bira realidad y cu ta lanta nan entusiasmo pa e deporte. “Bay na Madiki bo ta mir’e tur atardi ta yen, bay na Bushiri bo ta mir’e tur atardi ta yen, na Centro di Bario Brasil, na RCA,” e mandatario a comenta mencionando e canchanan cu ya ta cla y den funcionamento.
Cu e programa aki Gabinete Mike Eman II kier sirbi dos meta importante. E prome ta pa traha cu e barionan creando espacionan publico caminda e hobennan por pasa oranan despues di scol haciendo actividadnan sano y contribuyendo asina na un miho futuro pa nan mes y pa e bario. E di dos meta, y uno cu sigur ta e caso pa e bario di Dakota, ta pa for di chikito traha riba e continuacion di produccion di talento deportivo futbolista cu e districto ta asina bon conoci p’e.
Prome Minister Mike Eman a elogia Sr. Harvey Clement di directiva saliente di Centro di Bario Dakota, como tambe na e directiva nobo cu hunto a pusha no solamente pa e cancha, pero tambe pa otro trabounan di renobacion pa e edificio di centro di bario. “Dentro di algun siman e cancha lo ta completamente cla y nos ta gradici tur apoyo cu a haya di Comite Olimpico Internacional, di tur instancia cu ta yuda y tambe pa e trabou duro di Sr. Ditto Acosta di parti di Ministerio di Asuntonan Social,” asina Premier Eman a finalisa bisando.