Termento semper tawata un di e motibonan principal pa contacto di mucha y hoben cu Telefon pa Hubentud na Aruba, y termento semper a aparece den e top 5 di motibo pa contacto cu Telefon pa HUbentud. Pa e motibo aki Fundacion Telefon pa Hubentud Aruba a start na Aruba na ana 2012 cu e proyecto Prevencion di Termento na Scol.
Na 2012 e proyecto a start den forma di un proyecto piloto den 8 scol basico akinan nan Aruba. Prome cu a cuminsa cu emplementacion di e proyecto na Aruba, Oficina di Estadistica di Aruba a midi e comportacion di termento den e 8 scolnan basico. E estudio a mustra cu 56.6% di mucha a bisa e tempo ey cu nan ta pasa door di termento. Despues di e estudio Fundacion Telefon pa Hubentud Aruba a cuminsa emplementa e proyecto den e scolnan. Na momento cu a caba cu emplementacion, Oficina di Estadistica di Aruba a bolbe drenta e scolnan pa studia si por tin cambio di conducta. E estudio di Oficina di Estadistica ta mustra cu despues di a ricibi e proyecto di Fundacion Telefon pa Hubentud Aruba, e comportacion di termento a conoce un reduccion di 21%. Locual ta mustra cu e proyecto di Fundacion Telefon pa Hubentud Aruba ta efectivo.
Na 2016 Fundacion Telefon pa Hubentud Aruba a cuminsa cu un serie di training na docentenan di scol pa asina nan por haya conocemento ariba e tema, sina duna e proyecto, traha ariba nan protocol pa preveni termento y a ricibi tur material di e proyecto gratis. Te cu awor aki alrededor di 34 scol preparatorio, basico y secundario a ricibi e training aki na Aruba. Tambe un scol secundario di e isla di Bonaire a ricibi e training aki na 2017 y cual su docentenan a ser certifica pa duna Prevencion di Termento na Scol na e muchanan.
Bao di e muchanan na e isla di Saba tambe por a constata cu e comportacion di termento ta halto. Debi nan esaki Fundacion Telefon pa Hubentud Aruba a ser aserka door di Openbaar Lichaam Saba pa yuda cu e problematica aki.
Di 20 di februari te cu 2 di maart ultimo Fundacion Telefon pa Hubentud Aruba tawata na e isla di SABA y a duna training na un grupo di trahador social y di enseñansa di e isla di SABA. Despues di a ricibi e training nivel basico y nivel avansa, e trahadornan social y di enseñansa a ser certifica pa por duna e proyecto Prevencion di Termento na Scol na e isla di SABA. Awor tur mucha di e isla di SABA tambe ta bay ricibi e proyecto y asina aki lo reduci termento bao di e muchanan na Saba tambe.
E training na e trahadornan social y di enseñansa di Openbaar Lichaam SABA ta den cuadro di e ‘kenniscentrum’ di Fundacion Telefon pa Hubentud Aruba cu ta exportando conocimiento. Despues di 22 aña di excistencia Fundacion Telefon pa Hubentud Aruba como un ‘Kenniscentrum’ ta exportanando conocimento na organisacionan gubernamental y no-gubernamental den region. Banda di crea conocimiento y comparti conocimento, awor Fundacion Telefon pa Hubentud Aruba como un ‘Kenniscentrum’ ta bai sigui exporta conocimento.
Fundacion Telefon pa Hubentud Aruba kier a gradici su partnersnan cu ta tuma nan impacto social hopi serio y ta inverti den nos cuminidad. Un gradicimento ta bai na Aruba Airport Authority N.V., Web Aruba N.V., Setar, The Salamander Group y Openbaar Lichaam SABA.
Pa mas informacion tocante Prevencion di Termento por tuma contacto cu Fundacion Telefon pa Hubentud Aruba via nos website: 131.aw, Instagram: Instagram: 131aruba, facebook: https://www.facebook.com/telefon.hubentud/, email: [email protected] of telefon 5886138/ 5884011.