ORANJESTAD – Hof awe merdia a dicta sentencia den e protesta di Booshi Wever, contra e decision di Ministerio Publico di no persigui Otmar Oduber. Hof a declara e protesta di Booshi Wever no admisibel.
ARUBA NATIVE por a compronde cu Booshi Wever a defende su mes den Corte y awe Hof a dicidi e protesta ta no admisibel.
Diamars 14 di Maart 2023, Raadkamer a trata e protesta cu Booshi Wever a haci contra e decision di Ministerio Publico di no persigui Otmar Oduber pa e acusacion di Booshi Wever a haci.
E denuncia di Booshi Wever contra Otmar Oduber na Ministerio Publico ta cu Otmar Oduber a haci abuso di poder pa loke ta permisonan relaciona cu e incinerator. Fiscal di Ministerio Publico a informa Booshi Wever cu no tin motibo pa cuminsa investigacion penal contra Otmar Oduber.
Ta asina cu a base di ley, por haci un protesta contra decision di Ministerio Publico. Booshi Wever a haci esaki y el a defende su mes den Corte pa cu e protesta aki. Hof despues di a scucha punto di bista di Ministerio Publico, a sera tratamento di e protesta y a keda di dicta sentencia dentro di algun dia.
Awe den oranan di merdia, Hof a informa su decision. Hof a rechaza e protesta di Booshi Wever conforme e punto di bista di Ministerio Publico.
Esey ta nifica cu no ta bay tin un investigacion penal contra Otmar Oduber pa cu e denuncia haci di Booshi Wever.