Madiki Kavel – Diaranson den oranan di merdia un cantidad grandi di polis a bay un adres den Madiki Kavel, unda cu personeel di Respaldo tawata warda nan.
Team di Respaldo
E problema a start momento cu e personeel di Respaldo a haya nan confronta cu un pashent hopi agresivo. Esaki a pasa momento cu e pashent masculino mester a bay haya su medicamento.
Aki ta unda cos a bira basta tenso, na yegada di polis. Agentenan a bin topa un homber agresivo cu un martiu den man y decidido pa usa esaki.
Polis/nan di nan banda lo a saca arma y punta esaki ariba e homber, mester bisa cu tawata trata di basta polis na e sitio.
Mirando cu e situacion a bira serio y pa evita un drama, a pidi pa e team di aresto pa efectua e detencion mirando cu e homber a bay paden “sconde”.
Varios medida di siguridad a wordo tuma ora e homber a bay paden. Janine di Slachtofferhulp tambe a yega pa duna un man unda cu por.
A bay over na pone e cinta geel y hala personanan mas leu.
Na yegada di team di aresto por a scucha cu a kibra e porta y detene.
Algun rato despues e la wordo hiba Respaldo na Mahuma, unda cu lo sigui trata cu ne.
Den e casonan manera esaki hopi biaha ta cu posiblemente e persona aki lo no a ricibi sea su remedi na tempo of a fay’e pa algun dia causando e tipo di situacion nan manera esaki.
