“Claramente Endy Croes ta biba den un mundo di fantasia,” esey ta e conclusion cu parlamentario mr. dr. Ryçond Santos do Nascimento a yega na dje despues di a mira e conferencia di prensa cu e titular di deporte a duna na inicio di e siman aki. Croes kier profila su mes como e libertador di Fundacion Lotto Pa Deporte (FLPD) mey mey di un show caminda a uza e himno di Aruba y un film pa purba convence hende cu ne, sigui pa su discurso. Te hasta a bin cu cifra falso di cuanto Canada tabata y ta bay keda cu ne como comision.
Santos do Nascimento: “Ta ora pa nos realisa nos mes cu Endy Croes no ta su so. E no ta su so den e mundo di fantasia, di fabula; e no ta su so den e mundo di storia. Den nos politica tin tanto storia yen di heroe y hasta spirito. Esey ta locual nos ta bibando aden. Pero a bira ora pa lanta fo’i soño, pasobra e realidad ta cu si Fundacion Lotto pa Deporte mester di un hende pa salb’e, esey no ta Endy Croes, pasobra e tin custumbernan straño.”
Durante e conferencia di prensa semanal di Partido di Pueblo Arubano (AVP) teni pafo di edificio di Fundacion Lotto Pa Deporte den Paardenbaaistraat, e parlamentario a mustra e famoso rapport di Ernst & Young cu Endy Croes ta bringando actualmente den corte pa haya mas cu 3 miyon florin. Si Endy Croes gana e caso, ta FLPD mes ta esun cu lo mester paga e suma aki na e minister. Cu el a entama e caso aki ta, riba su mes, un conflicto di interes. E ta un conflicto di interes, falta di integridad propio y falta di seriedad pa cu integridad publico cu e bendicion di Evelyn Wever-Croes.
E parlamentario a splica cu e rapport ta bisa, entre otro, cu ora cu Endy Croes tabata na cabes di Fundacion Lotto pa Deporte, el a percura pa cera contract cu Quality Promotions, cu Quality Marketing & Entertainment; a percura pa tin contract cu Ecro Real Estate & Construction, contract cu Sofienne Holding, Radio FM 95 N.V. y Solo di Pueblo, ademas di Edmond Croes Broadcasting Company y Papa Johns Pizza.
Basa riba esey, e rapport ta indica: “Uit de financiele administratie pa FLPD is gebleken dat in de onderzoeks periode door FLPD ruim 5 miljoen is betaald aan bedrijven van de heer Edmond Croes en/of direct aan de heer Edmond Croes.” For di e administracion financiero di Fundacion Lotto Pa Deporte a saca afo cu den e periodo cu a investiga, FundacionLotto Pa Deporte a paga mas di 5 miyon florin na e companianan di Edmond Croes y/of directamente na señor Edmond Croes.
E argumento di Endy Croes no ta cu e no a haci loke e rapport ta bisa, pasobra ya esey a keda proba y sentencia na tur nivel di corte. Loke e actual minister ta bringando, ta e suma; esta cu no tabata mas di 5 miyon florin, pero 3 miyon y algo. Kier men ta hungando, segun Santos do Nascimento, un wega grandi di cu e ta victima y na mesun momento e libertador di Fundacion Lotto Pa Deporte.
“Si nos, como pueblo, no tin durf di papia e berdad; ken ta bay papi’e? Si nos no tin durf di papia e berdad cu autoridadnan, con nos autoridadnan ta bay cambia?” Ta pregunta cu e parlamentario di AVP ta haci. “E ta na nos con nos kier biba nos bida, si nos kier tin miedo of lanta para y exigi cambio den gobernacion, cambio den e manera con ta goberna e pais aki.”
Aruba no merece fabula, ni spirito, ni pelicula di teror, pero seriedad y capacidad, invertiendo den e futuro di e pais aki. E unico manera cu e pais aki ta bay cambia ta si nos como pueblo ta lanta y transforma e pais aki. “Pasobra nos no por mas, nos no por afford esaki mas pa otro 20 aña. Ta imposibel,” asina e parlamentario a finalisa bisando.