Oranjestad – Dia Internacional di Hende Muhe ta wordo celebra tur aña riba 8 di maart. E aña aki, Nacionan Uni tin como topico ‘DigitALL: Innovation and technology for gender equality.’ Cu esaki, Nacionan Uni ta spera di por pone enfasis riba e necesidad cu tin pa inclusion y transformacion tecnologico y educacion digital. Nacionan Uni, riba e dia aki, lo explora e impacto cu e ‘gap’ digital di genero tin riba aumento di desigualdad economico y social. Tambe lo pone luz riba e importancia di proteha e derecho di hende muhe y mucha muhe den espacionan digital y adresa violencia basa riba genero atraves di facilidadnan di ICT.
Como Minister di Finansa y Cultura, politico, pero principalmente como hende muhe eherciendo un trabou, mi kier a enfoca riba e importancia di proteha nos sernan femenino den e espacio digital. E era digital a trece hopi cambio mundialmente. Aruba tin actualmente 106+ mil habitante y estadisticanan ta mustra cu 86 mil hende aki na Aruba ta activo riba medionan social. Esey ta nifica cu mas cu 80% di nos poblacion ta haci uzo di medionan social y Facebook ta e medio social cu ta na prome luga cu mas hopi usuario aki na Aruba. Esaki ta crea e impresion cu practicamente ‘tur’ hende ta riba Facebook cual ta haci tambe cu e uso y, muy en particular, e mal uso ta domina.
Como mandatario, pero mas cu tur cos, como hende muhe y ser humano, mi a bin tuma nota cu e ultimo añanan, e atakenan personal riba e hende muhe y particularmente e hende muhe den politica a bira hopi mas riba medionan digital. Cuanto di nos a experencia con postnan denigrante ta bay rond pa rebaha hende muhe, y hende muhe mes ta comparti esaki. Awe, riba Dia Internacional di Hende Muhe, mi ta acerca bo cu e reflexion aki pa asina trece luz riba esaki y crea conscientisacion di e daño cu violencia contra hende muhe atraves di plataformanan aki por tin. Laga nos ta mas compasivo cu otro, laga nos ta mas tolerante, pero mas cu tur cos, laga nos ta mas humano y balora nos sernan femenino.
Ban semper duna un palabra di elogio na un ser femenino, comparti positivismo y para firme pa stop atakenan contra nos como hende muhe. Laga nos cuminsa enfoca mas riba nos mes, ‘take up space’, no solamente personal pero tambe di forma digital y laga nos stem resona. Laga nos ta hende muhe fuerte na mente, cu confiansa den nos mes y cu un actitud positivo semper. Awe ami, como hende muhe, ta saluda cada hende muhe riba nos Pais Aruba. Feliz dia di Hende Muhe.
FIN