Despues di 1 siman trahando intensivamente riba contenido di un centro di experticio, sra. Tea Hol (LVAK) hunto cu Stan van Haaren di UNICEF Nederland y Sue Ann Ras, beleidsmedewerker ministerio di Husticia y Asuntonan Social a haci un bishita informativo na Minister Tjon. E meta di e bishita tabata pa presenta minister di e iniciativa pa crea un centro di experticio digital como sosten profesional na e Supervisornan di Codigo di Proteccion como e Trainers di Codigo di Proteccion.
Centro di Experticio Digital
E centro di experticio digital aki tin como meta pa salvaguardia Codigo di Proteccion mediante e profesionalisacion di e Supervisornan y Trainers di Codigo. Tambe e centro di experticio aki lo desaroya material cu lo fungi como material di sosten den e implementacion, integra y ancra Codigo di Proteccion.
Minister Tjon ta aplaudi y ta hopi interesa den e iniciativa aki y ta confirma e importancia pa Aruba tin responsabilisacion di e forma con ta anda cu abuso di mucha y e profesionalisacion di e profesionalnan, manera e Supervisornan di Codigo. Un centro di experticio asina ta contribui enormemente, ya cu e Trainers di Aruba ta conecta kinan y e conocemento y informacion relaciona cu e forma con ta anda cu abuso di mucha, lo ta disponibel na e Supervisornan di Codigo. E Supervisornan di Codigo lo uza e informacionnan aki, na momento cu nan mester brinda sosten profesional na nan coleganan, na momento cu nan tin sospecho di abuso di mucha y cu mester uza e 5 pasonan di Codigo di Proteccion.
Plataforma Supervisor di Codigo y Trainers
Tambe tin e intencion pa desaroya un plataforma, unda e Supervisornan di Codigo ta bira miembro y cu nan por haci uzo di e posibilidadnan di profesionalisacion y e facilidadnan di e centro di experticio digital aki, un estilo di LVAK na Hulanda. A dialoga tambe cu Augeo Foundation, cu sigur ta interesa pa aporta na contenido di e centro di experticio digital aki. Tur e colaboracion aki ta realisabel, danki na e trabounan bon haci cu implementacion di Codigo di Proteccion y con ta percurando pa dun’e continuidad y structura duradero y sostenibel, pa traha na proteccion di nos muchanan. E centro di experticio digital aki lo ta resorta bou di Departamento di Mucha y Hoben (DMH).