182
Diamars atardi, dilanti di nan oficina situa den Vondellaan, Comite Olimpico Arubano a tene un conferencia di prensa, relaciona cu un delegacion di ehecutivonan deportivo encabesa pa e Presidente di Comite Olimpico Internacional, sr. Thomas Bach, cu lo ta na Aruba pa un bishita di trabou, dianan 10 y 11 di maart proximo.
Den su calidad di presidente di COA, sra. Wanda Broeksema a hiba palabra splicando e bishita di sr. Thomas Bach na Aruba.
“Awe presidente Bach a sali for di Suisa pa bishita e region di Caribe. Den e periodo di 28 di februari pa 11 di maart, shete pais y isla lo haya bishita di presidente Bach y e delegacion, unda cu 10 y 11 di maart e lo ta na Aruba pa dos dia.
Tabata 35 aña pasa cu un presidente di Comite Olimpico Internacional a hasi un bishita na Aruba. Esaki tabata na 1988 den persona di Juan Antonio Samaranch, awe den felis memoria. Pa COA e bishita di Presidente Bach ta uno hopi importante paso nos por mustra kiko COA ta haciendo cu e fondonan cu nos ta ricibi for di Panam Sports y Olympic Solidarity, Sra Broeksema a bisa.
Mester bisa cu e delegacion di ehecutivonan deportivo, banda di sr. Thomas Bach ta consisti di Sr. Neven Ilic kende ta presidente di Panam Sports y tambe sr. James MacLeod cu ta e Director di Olympic Solidarity. For di ambos instancia, Comite Olimpico Arubano ta haya e fondonan nesecario pa su atleta y federacionnan deportivo.
Segun Sra. Broeksema e programa lo bay ta dos dia extenso, mirando cu lo hasi varios bishita na dignitarionan importante di nos pais.
“E diabierna na e yegada lo bishita Su Excelencia Gobernador di Aruba, Sr. Alfonso Boekhoudt y despues tambe Conseho di Minister President di Aruba.
E mesun anochi lo tin un encuentro cu e “business community” di Aruba unda lo splica e importancia di deporte pa un pais y pakiko mester inverti den nos atletanan local. E diasabra lo tin un mainta special ya cu lo inaugura e oficina di Comite Olimpico Arubano situa den Vondellaan”, sra Broeksema a termina bisando.
