Ta baha e prijs pa dozijn di webo importa. Esaki lo trese alivio pa e consumidor, pero tambe lo stimula cu comerciantenen lo bende webo local y no e webo importa, un situacion “win-win”.
Pa calcula e prijs di webo importa, ta uza un margen di ganashi di 13% pa benta na mayor y 15% pa benta na consumidor. Cu un subida den e “landed costs”, e metodo aki pa determina e prijs awo ta pone cu prijsnan ta fluctua pa cada carga.
Actualmente tin un diferencia entre e margen pa webonan importa, compara cu webonan produci localmente, cual ta faborece e benta di e webo mas caro door cu e ta brinda mas ganashi. Si sigui mantene e margen como porcentahe riba webo importa, esaki ta tene e importacion di webo como e opcion mas atractivo pa e comerciante bende enbes di webo local.
Webo local ta e unico producto na Aruba pa cual ainda ta existi un proteccion di mercado. Gobierno ta sostene y kier sigui stimula produccion di webo local. P’esei ta proteha nos productornan local den forma di limitacion di e cantidad di webo importa y ta stipula prijs di webo pa proteccion di consumidor.
Pa proteha produccion di webo local y baha e prijs di webo importa, lo cambia e margen di ganashi riba webo importa na 50 y 60 sen pa dozijn desde 1 di maart 2023. E margen aki ta conta tambe pa webo produci localmente. Den cuadro di informacion y transparencia, minister Geoffrey Wever a informa Parlamento di Aruba riba e cambio den esaki.
“Vision di gobierno ta pa tin mas produccion local pa asina como pais nos ta menos dependiente di importacion. Produccion local ta limita y ta keda un reto, y pa es motibo ta importante banda di stimula y yuda productornan local, garantisa tambe importacion di webo pa sigui cumpli cu e demanda. Pandemia a siña nos con vulnerabel Aruba ta y cu nos mester haci nos maximo esfuerso pa bira menos dependiente di factornan internacional”, segun Minister Wever.