Na Hulandes tin un palabra “stapgewijs” cu ta nifica cu cosnan ta bay na ordo, sin bruha nan den otro pero gobierno di Prome Minister Evelyn Wever Croes, den un forma ordena ta “fix” su hendenan di gobierno cu a haci malo y esun cu tin cu paga e debenan aki, ta pueblo.
Benny Sievinger parlamentario pa fraccion di AVP ta mustra cu mientras cu Parlamento ta preparando pa ricibi e concepto di ley pa exonera Edison Briesen di un suma di 2.1 miyon florin, diaranson ultimo gobierno a logra di haya 11 parlamentario pa haci mesun cos, esta di drecha un fayo administrativo cometi pa Minister Xiomara Maduro.
“Ta bon pa pueblo realisa cu ta mesun gobierno aki, cu tanto a papia di integridad, un Prome Minister cu a dicidi di baha su gobierno pa motibo cu Allan Howell lo a comete algo cu no ta integro, awor ta drechando tur cos cu nan propio ministernan a haci malo cu placa di pueblo.
Na momento cu Prome Minister Evelyn bin Parlamento y gaña parlamento cu e rapport riba maneho di Guilffred Besaril na Arubahuis no ta cla, ta bin resulta cu e ta cla for di casi un aña caba.
Pa tapa su berguensa, pa sconde e berdad for di pueblo, yuda pa 11 miembro den parlamento cu a acepta su mentiranan, Evelyn a actua cu man duro segun su persona, kitando Besaril for di trabou, algo cu ningun hende ta kere cu lo a pasa.
Na fin di aña gobierno di Evelyn ta bin Parlamento c’un concepto di ley pa yuda libra su consehero Edision Briesen, di paga un suma di 21 miyon florin pa un decision cu el a tuma cu tabata contra reglanan.
E ley aki a bay pa Raad van Advies cu a conseha caba cu e cos aki no por pero despues cu siman pasa Briesen a ricibi bishita di Ministerio Publico y a wordo apunta como sospechoso pa cosnan contra ley, tambe Prome Minister a bin dilanti y a pidi tanto Endy Croes como Glenbert Croes pa retira Briesen como nan consehero ya cu e ta bou di investigacion.
Briesen tambe tabata consehero di Prome Minister pero awor diripiente e no ta conseha Evelyn mas y ta lanta e pregunta si e ministernan por retira Briesen como consehero ya cu e segun e DVO, Briesen ta den servicio di un compania cu ta pag’ue pa haci trabou pa gobierno.
Asina e Prome Minister di Aruba ta sigui manipula cu e berdad ya cu den caso di Besaril, ningun momento tin un keho entrega pa Evelyn contra Besaril pero pa un investigacion pa maneho di personal di Arubahuis.
Pueblo no mester keda sorprendi cu dentro di poco, Evelyn manda un concepto di ley pa parlamento, pa exonera Besaril tambe di tur loke el a uza sin cu e tin autorisacion pa esaki ya cu e lider di MEP ta trahando duro pa ehecuta un tipo di ‘afscheidbeleid’ ya cu cosnan ta mustrando malo pa su gobierno na e momentonan aki,” Parlamentario Benny Sievinger a mustra.