Oranjestad:
Recientemente a tuma luga e instalacion di un directiva nobo pa Aruba Karate Bond. Despues cu e directiva saliente, bou presidencia di “sensei” Felix Tromp, a duna un presentacion di e trabounan ehecuta den 2022, a pasa e timon pa e presidente nobo den persona di “sensei” Gustavo Velazquez. Su persona a keda eligi como presidente nobo hunto cu señor Felix Tromp den funcion di vice-presidente, señor Patrick Jansen den funcion di tesorero, señora Merrisza Tromp den funcion di secretaria y señor Ahli Mirjah den funcion di comisario.
Trabounan lo continua
E directiva saliente ta gradici tur presente pa nan apoyo. Awor por continua cu ehecucion di proyectonan existente y crea algun nobo. Ta gradici tur miembro y organisacion cu a sa di sostene AKB den e ultimo añanan. Aki por menciona sigur Comite Olimpico Aruba, Stichting Sportsubsidie Aruba, Lotto pa Deporte y Aruba Sport Unie cu semper -no obstante e diferente retonan- a keda sostene AKB.
Comision di actividad
Cu introduccion di e directiva nobo, AKB ta conta awor tambe cu un comision di actividad nobo. Ta desea e comision aki tambe hopi exito. Sin embargo, mannan extra nunca ta dimas y pues esnan cu ta dispuesto pa hinca nan tempo liber cu compromiso na karate di Aruba ta mas cu bon bini y por tuma contacto libremente cu AKB na [email protected]