URUGUAYSTRAAT – Diasabra den oranan di merdia un homber hunto cu su yiu a core yega na bisiña/nan buscando auxilio, debi cu e la wordo hinca.
Segun informacion cu nos a busca na e sitio for di testigonan, nos a haya lo siguiente.
E homber aki a core yega pidiendo ayudo y pa yama ambulance door cu e la wordo hinca y lo ta muriendo.
Tur esaki a pasa dilanti su yiu menor di edad, cu si ta bon a mira locual a pasa cu su tata.
Segun testigonan e homber sa ken a hink’e y di unda e ta bin. Na e sitio por a scucha cu e caso aki lo tin di haci cu un of su ex pareha.
Nos no ta bisando cu ta e ex lo a comete e acto, of e la manda un hende haci esaki.
Na yegada di polisnan y mirando e situacion critico cu e homber ta den a pidi pa un ambulance cu maximo urgencia.
Demas departamentonan concerni a wordo poni na altura tambe y den un tempo record tur tawata presente.
Den un estado critico pero na tino e homber a wordo hiba pa Hospitaal, unda cu polis mester a habri caminda pa e unidad di Ambulance yega mas lihe posibel Hospitaal.
Un investigacion rigoroso a tuma luga di parti autoridad despues cu e victima a wordo hiba di e sitio.
