Na final di januari e famia real a haci un bishita na e islanan di Caribe Hulandes cu e meta pa Prinses van Oranje cera conoci cu e islanan di reino den Caribe. Den e programma tabata tin diferente tema caminda a duna atencion na entre otro; naturalesa, historia kolonial , deporte pero tambe cultura. Den e delegacion tambe tabata presente e Staatssecretaris di Koninkrijksrelaties, sra Alexandra van Huffelen, Gobernador y Minister Presidente di Aruba.
Den e parti di e programma cultural di Aruba, tres proyecto di Stichting Monumentenfonds Aruba sigur a haya atencion durante di e programma di bishita real.
Primeramente e pareha real y e princesa a bishita e proyecto ‘Op zoek naar Boy’, E proyecto ta un homenahe transnacional pa e hoben heroe di Aruba, Boy Ecury, cu a duna su bida dia 6 di november 1944 pa libertad di Aruba y Hulanda.
Un hoben extremadamente balente y integro cu te awendia ta un ehempel pa nos tur.
Stichting Cultuurgeneratie a nota e falta di un mural dedica na nos propio heroe di Dos Guera Mundial y asina hunto cu Colegio San Antonio, Filomena College Mavo, Muchila Creativo, MBO Media College Amsterdam, Fonds voor Cultuuparticipatie, Monumenetnfonds Aruba y Departamento di Cultura Aruba, a bay en busca di Boy.
Durante e proyecto aki e alumnonan a investiga e archivo digital di famia Ecury. E archivo aki a keda digitalisa pa Archivo Nacional Aruba y Nederlands instituut voor oorlogsdocumentatie.
E investigacion aki a forma e base pa nan expresion creativo den workshopnan di teatro, poesia y arte visual.
E artista Esmeralda Kelly a crea un mural riba e muraya na Filomena College, inspira pa e ideanan di e studiantenan durante nan workshopnan bou di direccion di Esmeralda Kelly y Rudberth Wolff.
Pa loke ta e studiantenan di Colegio San Antonio a crea un tableau vivant cu acompañamento musical di alumno y maestronan di Muchila Creativo. A crea e obra aki dedica na Boy Ecury bou di guía di coachnan di teatro Lupita Bernabela y Jhon Freddy Montoya.
Durante nan bishita na Filomena College e famia real por a admira e mural y cuadranan crea pa artista Esmeralda Kelly y e studiantenan y tambe e obra teatral a keda presenta pa e alumnonan di Colegio San Antonio y Muchila Creativo. Despues di e presentacion e famia real a cana bay pa e Watertoren San Nicolas, un monumento di Stichting Monumentenfonds Aruba di mas di 80 aña.
Despues cu den añanan trinta di e sieglo pasa Aruba a cuminsa cu distribucion di awa via un red for di e fabrica na Balashi crea pa desalina awa di laman. Esaki a trece tambe un aumento den e demanda di awa pa cual a dicidi di construi dos toren di awa un pa Oranjestad y un pa San Nicolaas, ambos construi den un estilo Art Deco y inaugura na aña 1939. Despues cu pa hopi aña e torennan a keda fuera di servicio e compania di awa a bende esakinan pa un suma simbolico di 1 florin na SMFA. Cu prestamo local y un prestamo na interes abou di Nationaal Restauratiefonds (NRF) a logra restaura ambos toren. E toren di San Nicolaas cual a keda bishita pa e famia real durante nan bishita ta for di 2016 e Museo di Industria na Aruba.
Por ultimo e famia real a haya e oportunidad pa conoce e bunita y iconico edificio di Nicolaas Store, for di caminda hunto cu nos directora, Anne Witsenburg, a disfruta di e presentacionnan hunto cu e comunidad di San Nicolaas.
Nicolaas Store ta un monumento cu ta resalta pa su arkitectura unico riba e isla y cu a keda construi den añanan cuarenta pa señor Nicolaas. E tabata un comerciante cu a yega Aruba den añanan trinta y cu hunto cu su famia tabata habita e prome piso di Nicolaas Store. Na e piso abou e tabata bende entre otro buki, corant, instrumentonan, regalonan y hopi mas. Un di e tienda nan mas popular y un punto di encuentro na San Nicolas cu lamentablemente despues cu e refineria a cera, tambe a cera su portanan. Despues cu pa mas di 20 aña a keda bashi, e famia a bende e edificio cu SMFA. Cu financiamiento local y NRF a logra restaura e monumento aki completamente y dun’e un funcion nobo. E la keda comberti den Community Museum na 2014. Y na e piso abou actualmente ta encontra e conocido Kulture Café.
Pa SMFA como un fundacion chikito cu mas di 26 aña di existencia, sigur tabata un honor di por a presenta parti di nos proyectonan y cu e famia real por a conoce algun di e 16 monumentonan cual nos ta propietario di dje. E fundacion no solamente ta enfoca riba e compra, restauracion, mantencion y huur di edificionan monumental pero tambe ta pone hopi enfasis riba e parti di educacion y conscientisacion di e historia y storianan tras di nos monumentonan y rol importante cu nan tin como parti esencial di Aruba su herencia cultural.