ORANJESTAD 06-02-2023 – President di Dutch Caribbean Nature Alliance (DCNA), Dr. Hellen van der Wal, a expresa su preocupacion tocante cooperacion riba tereno di maneho di naturalesa y cambio di clima dentro di Reino. Segun Van der Wal, desigualdad, manera den e forma recien di atende cu e efectonan di cambio di clima, ta pone e cooperacion aki na peliger. “Door di apunta Boneiro como un showcase pa e “island states”, e otro paisnan di Caribe Hulandes ta den desbentaha, mientras cu tur e islanan tin cu lidia cu e mesun problemanan. Un trato preferencial asina ta notabel si tene cuenta cu e cambio climatico ta afecta henter e region. Trahamento hunto ta crucial, specialmente riba tereno di naturalesa y maneho di naturalesa”. Dia 31 di januari ultimo, dia di cumpleaño di patron di DCNA, Su Altesa Real Prinses Beatrix, Dr. van der Wal a pidi famia real y secretario di Estado Van Huffelen pa nan promove cu Reino no ta dividi nos, sino cu e ta conecta nos cu otro.
Despues di un hike intenso famia Real a bishita dia 31 di januari Hofi Shoco den Parke Nacional Arikok di Aruba, na unda, entre otro, a tuma luga un reunion cu presidente di Dutch Caribbean Nature Alliance (DCNA). Na e ocasion aki a pidi atencion special pa un trato comun di e islanan y Hulanda pa loke ta trata maneho di naturalesa y tratamento di e consecuencianan di cambio climatico.
“Nos tin desafio similar na e islanan: no solamente e efectonan di cambio climatico, sino tambe, por ehempel disminucion di e biodiversidad, e procesamento di desecho y tratamento di awa residual y nos dependencia excesivo di turismo. Tur ta menasa bienestar di e habitantenan di e bunita islanan y e estado di naturalesa. Tur ta rekeri un enfoke comun y solucion basa riba naturalesa”.
E aliansa, un red di organisacion di naturalesa, tin hopi aña caba demostrando cu cooperacion ta posibel. Pasion pa naturalesa, pero mas cu tur cos interes y meta comun ta central den esaki. Pa e motibo aki DCNA a ofrece un plan di accion climatico caba na Hulanda na principio di aña pasa. “Den e plan aki nos ta afirma cu adaptacion climatico ta e principal prioridad. E ora ya caba nos ta papia di maneho di naturalesa. Ademas di e yamado pa accion, nos ta insisti fuertemente riba e necesidad di un enfoke comun. Esaki no solamente lo beneficia participacion na e islanan, sino lo duna miho resultado tambe y lo garantisa cu e conocemento y e experiencia ta keda miho reparti. Sin duda debi na e fanfaria di un ONG internacional, gabinete Hulandes a opta pa converti Boneiro den un showcase. Riba peticion di e isla aki, lo instala ayanan un mesa climatico awor. Hulanda mester a percura cu e otro paisnan (islanan) tambe lo tabata involucra. Den luna di maart di e aña aki ta bay tuma luga na Aruba un gran conferencia tocante clima di Caribe. Nos ta aplaudi esaki, pero dicon no por pone e asunto di un mesa climatico comun ainda riba agenda?”, Van der Wal ta puntra.
“Naturalesa no conoce frontera. Tampoco e consecuencianan y efectonan di cambio climatico. Sinembargo, tin biaha Reino ta impone limite debi na structura constitucional y cierto opcion di maneho. E distincion entre e paisnan CAS y e islanan BES ta desastroso pa un enfoke comun di interes. Si solamente algun di e seis islanan obtene hopi recurso y oportunidad, ta bira dificil pa traha cu e seis islanan. Despues di tur cos, pakico un isla lo coopera cu otro si e por regla tur cos su mes? Ta ironico cu Reino, cu ta supone di conecta, ta dividi di e manera aki. Y show off cu un of algun isla por duna un mensahe robes. Esaki tambe ta afecta e sentido di comunidad y ta debilita e interes di e demas paisnan (islanan)”.
SAR Prinses Amalia a ricibi un copia di e Plan di Accion di Cambio Climatico di DCNA na su salida: “Ta trata di nos futuro, y Su Altesa ta parti di nos futuro”, President di DCNA, kende a invita Famia Real a bisa pa apoya e esfuersonan di DCNA pa un enfoke comun y pa cooperacion y solidaridad entre e seis islanan di Caribe Hulandes y Hulanda Europeo.
Potret: Ayrton Tromp – ARTN Photography, Aruba