Ora nos ta papia di deporte den su totalidad, nos tin di cuminsa na stimula deporte escolar. Deporte escolar mester bira e instrumento pa motiva mas mucha pa drenta deporte organisa na Aruba. Lamentablemente e ultimo añanan por a mira deporte escolar bay atras den participacion pero sigur tambe den calidad. Por a tuma nota di ideanan noble cu a ser treci dilanti manera e idea di televisa deporte escolar y tambe implementa Olimpiada Escolar, pero e raiz di e problema mes no a ser atendi unda cu no a ser busca e motibo pakico e participacion a baha drasticamente sin conta e calidad di competencia.
Motivacion y participacion
Un di e problemanan mas grandi ta e motivacion pa participacion. Den deporte escolar e docentenan ta hunga un rol importante den esaki. Dia pa dia nan trabou den klas ta bira mas pisa y ta exigi mas di nan den oranan despues di scol pa traha riba nan trabaonan pa e siguiente dia. Otro aspecto ta cu den hopi scol den cuerpo di docente no tin experencia cu deporte organisa y sigur con pa traha cu e muchanan cu ta hunga un rol importante. Hopi docente cu semper a participa pa añanan hamas a ser reconoci pa e trabao boluntario cu nan ta haci pa e mucha. Hopi di nan ta laga nan yiunan un banda pa dedica tempo na nan y pa atardi y anochi train mucha, pero hamas nan a haya ni un reconocemento pa nan trabou y hopi di nan a stop di participa, cu e consecuencia cu otro docentenan na scolnan no a sigui e trabaonan cu nan tabata haci y asina hopi scol no a participa mas. Hopi biaha tambe falta di organisacion y bon planificacion di periodo di weganan tambe ta hunga un rol importante.
Mehora calidad den deporte
Falta di infrastructura, material y conocemento tambe ta hunga un rol importante pa mehora calidad y participacion. Tin scolnan na Aruba cu ainda no tin nan gymzaal propio y otronan nan gymzaal ta den hopi mal estado cu vloernan deplorabel. Tambe por ehempel pa practica e deporte di atletismo no tin e infrastructura ni na scol ni cerca mayoria di e scolnan pa por practica. Scolnan ta carece di material deportivo cu ta haci dificil pa train mucha optimalmente y sigur falta di placa ta hunga un rol importante pa yega na uniform pa participa. Otro aspecto importante ta conocemento con pa siña e muchanan lo basico di cierto deporte den staff di e scol. Enberdad mayoria di scol tin un docente actual di gym cu a caba IPA den e proyecto di Movecion y Salud, pero hopi falta conocemento di con pa siña e hoben lo basico di cierto deportenan manera futbol, basketball, volleyball, atletismo etc. Tambe e falta di un planificacion deportivo (curiculo deportivo) pa scolnan pa formacion di e hoben den deporte na scol tambe ta hunga un rol importante.
Desaroya deporte escolar
Nos di MEP ta kere den stimula participacion, den percura pa mehora facilidadnan deportivo escolar unda lo bay renoba gymzaalnan y haci nan optimal pa uso diario. Tambe lo crea den barionan infrastructura cu scolnan por usa pa practica por ehempel atletismo, futbol etc. Nos lo percura pa materialnan necesario pa practica optimalmente y sigur uniform pa scolnan. Lo percura pa premionan atractivo pa participacion di scolnan y sigur duna reconocemento na esnan cu ta dedica nan tempo liber na deporte escolar. Banda di esaki lo percura pa duna cursonan di upgrading na e docentenan cu ta percura pa deporte na scol unda cu docentenan di klas tambe lo por participa y siña lo basico pa por train e muchanan den cierto deportenan y lo destina pa cada distrito un instructor cu tin di percura pa desaroya deporte escolar den nan area destina. Lo percura pa un curiculo deportivo y tambe IBISA lo mester bay hunga un rol hopi importante den desaroyo di deporte escolar y mercadeo di deporte escolar ta algo esencial.
Una bes cu tin esakinan mi tin sigur cu participacion lo subi drasticamente y alavez e calidad di competencia lo ta uno halto y sigur cu lo por bay na televisa esaki pa mayornan cu ta traha tambe por sigui esaki.