ARUBAARTFAIR2022: No tin ningun sistema mas efectivo pa laga un persona of grupo sa kiko
bo ta representa cu laga nan experimenta pa nan mes di serca p’asina comprende e producto y
por propaganda un poco mas e beyeza di experiencia cu bo por haya ora a bo ta di bishita na
San Nicolas.
Bao di auspicio di ArtisA, un invitacion a bay na tur concierges di hotel of condominium na
Aruba pa hunto experimenta un anochi na San Nicolas. Un grupo grandi a acudi y a yega
Promenade den bus.
Armando Goedgedrag kende actualmente ta luci su Solo Expo “Desvela” den e galeria ArtisA, a
yama e grupo bon bini y a conta di su obranan. Un bunita oportunidad pa conoce e artenan di
serca.
Tito Bolivar, director di ArtisA a describi e diferente proyectonan cu ta wordo hasi durante di
aña enfatisando riba e culminacion cu ta Aruba Art Fair 2022, November 4.5.6, 2022.
Bao di guia di Renwick Heronimo, curator official di Aruba Art Fair, mas di 80 artsitanan local,
entre nan e mihornan di Aruba lo expone den e cayanan di Promenade, nan arte pa publico
local, mientras cu tres diferente edificio lo fungi como galleria pa obranan di Sticusa, 100 aña di
Postkantoor y mucho mas, tratando asina di trese loke ta historia cu ya a pasa, pa encontra cu e
historia cu awor ta wordo skirbi, esta e obranan recien, moderno y vivaz di nos artistanan.
Un storia ta wordo conta e anochinan aki. Entre otro diabierna cu ta dedica completamente na
San Nicolas, cu su musica, su declamacionan, baile y canto y mas cu tur otro su dushi cuminda.
Diasabra ta dedica na hubentud. Mayoria di scolnan di baile di Aruba lo ta desfilando. Musica
pa e hobennan. Arte tresi dilanti pa hobennan. Y tambe e pre final di Gang di Arte cu ta un
Proyecto bao di guia di Julie Emerencia y su grupo na Departamento di Cultura. Poder di
Hubentud tambe lo ta presente e anochi aki.
Diadomingo lo ta e culminacion na unda tur ser humano cu ta stima nan Cultura ta uni den un
Parada Cultural. Mas di 20 pais ta participa cu nan custumbernan, nan baile, musica y Cultura.
Despues di e splicacion, esunnan presente a haya e oportunidad di mira e murayanan cu ya a
wordo restaura y tambe esunnan cu na es momento ey ta wordo pinta.
Un Danki en especial na O’Neals cu ta parti di e experiencia di San Nicolas. No solamente pa
tuma e tempo pa bin conoce tur e concierges pero pa e tremendo plato traha especialmente pa
nan, p’asina un biaha mas laga su estampa atras como un di e restaurantnan mas gusta aki na
Aruba.
Promenade ta bay bisti di fiesta y e Danki na tur e concierges, maestronan, cu diariamente ta
dirigi e turista pa experiencianan unico y fabuloso rond di nos isla, na momento cu nan ta
bishita Aruba, y awor lo enfatisa mas riba e experiencia unico cu ta Promenade y e murayanan
na San Nicolas.
Aruba Art Fair lo ta unico y ta warda bo bishita. Carchinan ta obtenible na tur Citgo, Plaza
Bookstore, Superfood y na ArtisA. Tambe via pay.aw.
