ORANJESTAD: Parlamentario Aquannette Gunn a cuminsa na bisa cu e ta haya e plataforma di ‘Nationaal Statistisch Systeem’ uno sumamente importante, mirando cu aki na Aruba diferente departamentonan ta uza nan mesun formato pa cu data cu hopi biaha ta haci esaki no efectivo y mucho menos eficiente pa por tin algo central y garantisando cu bo tin e seyonan debido pa por cumpli cu tur e criterianan stipula.
Sra. Gunn ta contento pa scucha cu Minister Wever ta basa su mes riba hechonan, y cu no ta trahando na un manera adhoc. Sinembargo tin varios cos cu ta preocupa parlamentario Gunn. Tin varios aspecto cu algun ministerio tin cu adresa y ahusta pa loke ta trata nan maneho.
Por ehempel e personanan berdaderamente ta bibando mas largo, sinembargo si nos wak e calidad di bida cu e personanan ta hiba, irespecto kico ta e motibo cu nan condicion di bida ta di tal forma nos tin hopi trabou pa haci pa mehora nan calidad di bida. Den e parti di conscientisacion nos ta na un crusada, caminda ainda nos tin cu traha primordialmente riba e parti di remedia te ora cu nos tin e parti aki bou di control, nos lo por bisa “ok” kico nos como pais Aruba lo haci specificamente pa loke ta e forma preventivo. Mirando cu tin asina hopi aña a transcuri, nos no por bisa cu di awe pa mayan nos ta bay traha solamente na e parti preventivo.
Ta un hecho cu na un edad hoben bo tin hende ta sufriendo di por ehempel obesidad, pero atrobe e ta bay tuma su tempo pa bo por cambia e ‘mindset’ y otro factornan esencial cu gobierno tin cu traha na dje pa garantisa cu tur hende por tin acceso na alimentacion saludabel y conscientisacion continuo.
Sra. Gunn a puntra e mandatario cu considerando cu e Plataforma aki tin un costo di casi 6 miyon y cu den e concepto di e presupuesto 2023 tin 2.5 miyon stipula pa locual ta inversion pa cubri parcialmente e proyecto, si su persona no ta comparti opinion cu dirigiendo un carta pa Hulanda unda ta haci e peticion pa e gastonan di inversion keda completamente subsidia door di Hulanda lo haci cu e proyecto sin duda lo keda concretisa. Mas ainda teniendo na cuenta cu pais Aruba tin un acuerdo haci cu Hulanda pa loke ta e surplus.
Tambe e parlamentario a puntra e funcionario cu ta encabesa e comision di NSS tocante a parti legislativo, unda cu su persona a indica cu DWJZ a pidi mas tempo pa haci revision loke ta e cambionan legislativo, si su persona ta mira cu e tempo adicional cu nan a pidi como algo factibel. Mas ainda cu tin hopi desaroyonan cu tin cu tuma lugar na pais Aruba cu ta implica aspectonan legislativo, pero e departamento ta conta cu e mesun cantidad di expertonan cu tin cu desplega tur trabou parlamentario Aquannette Gunn a termina bisando
//////