ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber J.K. (25). E ta wordo acusa cu riba 1 Mei 2022, el a purba di mata un agente di Polis, menaza dos persona cu un ama di candela y posecion di arma di candela.
ARUBANATIVE por a compronde cu Fiscal a baha pisa riba J.K. y a exigi 11 aña di prison.
Tur e incidentenan aki a sosode riba 1 Mei 2022 den oranan di anochi. Hues a mustra cu J.K. a lasta un agente di Polis, M. na banda di e auto riba un distancia largo y despues a dal contra un palo di luz. Den sala di Corte tabata presente familiarnan di J.K. y e agente di Polis, M. hunto cu un otro colega y su pareha.
PURBA MATA POLIS
Hues a mustra cu ora e agente M. a wanta e auto pa ordena J.K. pa para, J.K. a sigui core lastr’e y despues a dal contra un palo di luz y e agente a resulta herida. J.K. a desmenti. El a bisa Hues cu e tabata cu dos amigo ta trip y bebe. Un dado momento un auto brake, G. y un otro a discuti cu un amigo. El a sali pa stop e discusion pa sigui trip. Segun J.K. el a subi auto pa bay cas, Polis a par’e y puntr’e cu si e tin arma di candela. E momento ey el a realiza cu e tin un arma y a pensa cu e no kier bay sera. El a start e auto bek y primi trot. E momento ey e agente di Polis M. a coy stuur tene. Na dado momento e auto a dal contra acera y e agente a cay y e auto a bay dal contra un palo di luz. Segun J.K., el a spanta y a sigui core bay. E no sa con el a yega cas. Segun J.K., ningun momento tabata su intension causa daño na e agente di Polis. Hues a remarca cu J.K. a primi trot mientras cu e agente di Polis tin su man hinca den auto. Segun J.K., e momento ey e no a pensa. E tabata hopi burachi.
AGENTE DI POLIS A KIBRA MAN
Hues a bisa cu segun e agente M., ta J.K. a gara su man y primi trot. J.K. a bisa Hues cu e ta hura cu esey no ta berdad. Hues a bisa cu segun e agente e kier a coy e yabi di auto pero no a logra. El a sinti con J.K. a gara su man gara y primi trot y bay riba un palo di luz. Na un momento J.K. a cuminsa stuur auto cu su dos mannan. Net promer cu el a dal contra palo di luz, e agente di Polis a los. Segun J.K., e agente a tene e stuur di auto. E ta haya cu e agente por a lag’e bay y despues sigui su tras. Na opinion di J.K., e agente a pone su bida y esun di J.K. na peliger. Hues a mustra cu e agente M. a kibra su man na un forma hopi fastioso.
POSECION DI ARMA
Hues a bisa cu J.K. tabatin un revolver cu bala. J.K. a admiti di tabatin e arma den auto. J.K. a core bay, lagando e agente di Polis herida atras. Despues Polis a haya e auto pero J.K. no tabata tey. Un periodista a mustra Polis cu tabatin un arma benta na banda di caminda..
MENAZA DOS HENDE
Hues a bisa cu na un club nocturno, Upstairs, J.K. lo a menaza 2 persona. J.K. a splica cu e cu dos amigo tabata trip. Un auto a brake y e homber G. tabata discuti cu un otro persona. El a baha pa calma e asunto y despues a sigui bay. Nan a bay den Upstairs y eynan el a topa e homber G. atrobe. El a bisa Hues cu el a bisa G. cu e no conoce y pa evita problema. E homber G. a dal’e cu un boter na su boca. J.K. a baha trapi tur rabia y a bolbe subi cu un arma pa topa cu G. pa spant’e pero G. no tabata tey mas. Hues a bisa cu segun G., el a mira J.K. lanta su flanel y el a mira e revolver. J.K. a bisa Hues cu G. ta gaña pasobra e no tabatin e revolver cun’e. El a bisa cu e otro persona cu tabata cu G., P., a bisa cu ta un otro persona cu cabey rasta, a lanta flanel y mustra e revolver. Hues a bisa cu ta berdad. Despues J.K. a haya e arma y a mustra P. esaki. Hues a bisa cu e personanan a bisa cu J.K. lo a bisa cu e lo tira G. mata. Segun J.K. e no a bisa nada.
Hues a mustra cu J.K. no mucho tempo pasa a wordo condena na 4 luna di prison pa violencia. Tambe cu J.K. a haya condena di 3 aña di prison pa un atraco.
DEMANDA DI POLIS
Ta asina cu e agente M. a haci un demanda di daño total di 50 mil florin. E agente a splica Hues cu el a haci ya caba 2 operacion y aki un aña, e lo mester haci otro operacion pa kita e plachinan y schroefnan na su man. Tambe mester wak con su curpa ta recupera di slanan cu el a sufri na pia. Te ainda no ta trahando. E no ta sigur si su man robez lo ta funciona completo. Ainda falta e di tres operacion. El a bisa cu lo bay cuminsa traha bek e luna aki, pero e lo no por bay traha riba caya sino paden. Segun M. el a keda mental afecta. No por bisa con e lo por sigui traha. E tin pensa cu e lo mester bay papia cu un psycologo. E tabata hopi depresivo.
CANA CU ARMA DEN CLUB NOCTURNO
Fiscal a bisa cu e ta haya legalmente proba menaza cu arma di candela di e hombernan G. y P. den club nocturno. Tabatin un incidente dilanti di e club nocturno y despues problema den e club nocturno. El a mustra cu P. a bisa cu J.K. cu arma den man a puntra unda G. ta. J.K. a busca e arma pa bay menaza G., despues cu G. a dal’e cu boter na boca. Fisal a remarca cu esey no ta forma di ta cana den un club nocturno cu un arma. El a sigui bisa cu J.K. ta desmenti cu e arma ta di dje pero ta admiti di tabatin e arma cun’e.
AGENTE DI POLIS LASTRA 98 METER
Fiscal a cuestiona e forma con e agente di Polis a wordo herida. El a bisa cu nan a actua despues di cu a haya notificacion cu tabatin un problema. A para J.K. y ora a puntr’e si e tin arma, el a start auto y primi trot mientras cu agente M. a keda wanta na e auto ora e tabata kier a kita switch. Despues di a wordo lastra un distancia di 98 meter, el a logra los. E auto a dal contra acera, dal contra un palo di lus y core bay. M. a tapa su cara cu man robez promer cu el a dal contra e palo di luz. Despues a haya e auto cu tire rementa y e arma benta un banda. J.K. no tabata tey. Fiscal ta haya cu J.K. kier a mata e agente di Polis. E ta haya cu ta J.K. mes a hinca su mes den e situacion aki. Fiscal a señala cu J.K. tin un carchi di castigo alarmante.
Fiscal a pidi pa confisca e auto cu J.K. a usa como un arma y saca e arma di candela for di circulacion.
Pa loke ta e demanda di e agente M., cu ta alrededor di 50 mil florin, Fiscal a bisa cu e agente no ta trahando y e no por exigi demanda pa cobra pa overtime pero si oranan di trabao. Fiscal a pidi pa aproba 5 mil florin di daño material. El a bisa cu M. lo por cuminsa un caso civil pa haya e resto. E parti inmaterial, cu ta encera e man fractura y problema mental, Fiscal ta haya cu por aproba e 21 mil florin. El a exigi pa aplica medida di pago y si J.K. no paga, e lo mester bay 1 aña sera den prison.
CASTIGO
Fiscal a mustra cu e agente di M. a resulta herida durante haciendo su trabao. Ningun momento por a spera cu algo asina lo sosode. Esaki a sacudi comunidad y a crea sentido di inseguridad. Esaki a sacudi Cuerpo Policial. Fiscal ta haya cu mester baha cu man duro contra esun cu ta actua contra trabao di Polis. E ta considera J.K. un residivista di arma di candela. Fiscal a exigi 11 aña di prison.