ORANJESTAD – Awe mainta Corte di Husticia a trata e lamentable caso penal cu Ministerio Publico a cuminsa contra Jason Mathilda (32), kende riba 13 December 2021a tira mata su tata E. Mathilda. Jayson tambe ta wordo acusa di posecion di arma y tambe balanan Caliber 22 y Caliber 9 mm.
ARUBANATIVE por a compronde cu Fiscal a exigi 10 aña di prison y TBS (tratamento psychiatrico obligatorio) na Hulanda.
SOSPECHOSO NO TA CORDA BON
Hues a puntra Jason kico a sosode. El a admiti di a tira mata su tata. Segun Jason, e tabata burachi y no ta corda mucho bon kico realmente a pasa. Hues a bisa cu Jason a bisa Polis cu e anochi ey e y su tata a bay un fiesta. Na dado e tata a bay cu un boter di whisky di Jason. Jason a haya esaki fastioso. El a bay e apartamento unda su tata tabata keda cun’e temporal. El a topa su tata y a surgi un discusion. El a bisa cu su tata a dal’e y el a dal su tata bek. Segun Jason ora el a drenta e apartamento el a sinti holor di droga. E no tabata di acuerdo cu su tata tabata usa droga. Esey a sosode den e apartamento. El a bisa su tata cu e ta bay coy su arma pa warda esaki. E ora ey e tiramento a pasa. Hues a puntra pakico Jason a tira, el a bisa cu e tabata hopi halto pero no tabata su intension. El a bisa Hues cu si realmente e tabata kier a mata su tata, e lo a traha un plan. E arma tabata carga cla pa tira. Segun Jason, asina e ta cana rond cu e arma. Hues a keda haci serie pregunta y Jason a keda bisa cu su intension tabata pa warda e arma. Na dado momento, Jason a bisa Hues cu su tata tabatin un machete den su man ora el a bolbe for di auto. El a bisa Hues, kico Hues kier pa e haci. Hues a mustra un potret di un cuchiu di cushina grandi y Jason a bisa, e por ta esey. El a bisa cu p’e el a mira un machete y a defende su mes. El a keda bisa Hues cu e no ta corda nada.
TESTIGO A MIRA E TIRAMENTO
Hues a bisa cu Polis a scucha testigonan. Un dama V., cu sa bay bishita hopi e cas, a bisa cu e dia ey e tabata eynan. Patras den e apartamento Jason ta keda cu e tata. El a mira auto di Jason para y for di un camber el a scucha e discusion entre Jason y su tata. El a scucha Jason bisa, mi ta mata bo. Sali pafor si bo ta homber. E ora V. a bay den cushina y a laga e luz paga pa asina e por wak pafor sin cu nan ta mir’e. El a mira Jason core bay na su auto y su tata su tras. Na dado momento e tata a stop di core y bay bek. Jason tabatin un arma color di nikkel wanta cu su dos mannan. Jason a dirigi e arma den direccion di un mata di banana y a bisa, awor mi tin bo. A scucha un tiro y a scucha hende keha dolor. El a mira con Jason a coy su tata na su piananan y lastr’e pa su auto.
Un otro dama na e cas a bisa cu e tambe a scucha discusion y na dado momento un a bisa pa bin pafor y lo mira kende ta homber. El a scucha un tiro y e tata tabata keha di dolor.
ARMA HAYA BENTA BANDA DI CAMINDA
Hues a bisa cu segun investigacion, E Mathilda a sufri un tiro bou su cocodek robez. Hues a puntra Jason si e tata tabatin e cuchiu den man robez. Segun Jason, su tata ta man drechi. El a bisa cu e no ta corda kico realmente a sosode. El a bisa cu su tata tabata huma piedra. Despues di tiramento, el a tira e arma afor. Despues di mas o menos 6 luna, Polis a haya un arma benta abao na otro banda di caminda. Jason a reconoce e arma cu ta esun cu el a usa. El a bisa cu e balanan cu a haya den e apartamento no pa e pistool sino un rifle cu e ta usa pa tira cachonan. Hues a puntr’e pa e arma y el a bisa cu esey ta bon warda den cunucu.
RAPORT PSYCHIATER
Hues a mustra cu Reclasering a traha un raport, Psycologo y Psychiater a traha rapport. El a mustra cu no ta promer biaha cu Jason a mata. Jues a bisa cu e raportnan den linea grandi ta cuadra cu otro. E psycologo y psychiater ta mustra cu Jason tin problema mentral, anti social cu ta causa cu hopi liher e ta rabia. Ora e rabia e ta usa violencia. E no por controla su agresividad y emocionnan. Nan ta mustra cu si Jayson no wordo trata, e chens ta grandi cu e lo bolbe haci loke el a haci. Nan ta bisa cu e ta menos responsabel pa su actonan. Nan ta bisa cu e mester TBS (tratamento obligatorio den un institucion).
Hues a puntra Jason kico e ta pensa pa futuro. El a bisa Hues cu henter su bida den prison, kico e por pensa pa futuro. El a bisa Hues cu e ta un persona hopi trankilo y no ta deal cu hopi hende. Hopi biaha e ta den mondi. Hues a remarca cu e hecho cu e no ta anda cu hende ta mustra cu 2 biaha a mata hende. Hues a puntra Jason si e kier tratamento. El a bisa Hues, si esey mester sosode, ta asina. El a bisa Hues cu e sa cu el a haci malo y ta spera 15 pa 20 aña di prison pa loke el a haci.
FISCAL TA EXIGI 10 AÑA DI PRISON Y TBS
Fiscal a bisa cu e ta haya legalmente proba cu Jason a tira mata su tata. El a bisa cu Jason a admiti di a tira su tata mata. El a bisa cu el a defende su mes contra su tata. El a bisa cu su tata a coy un machete y el a bay auto pa coy su arma. Ora el a bolbe apartamento, su tata a bula riba dje cu un machete y el a tira pa defende su mes. E testigo ta bisa cu tabatin discusion y el a mira Jason core bay na su auto y su tata su tras. Na dado momento e tata a para y core bay bek. El a mira Jason cu arma den su man y dirigi riba mata di banana y bisa: “Awor mi tin bon” El a scucha tiro. Fiscal a sigui bisa cu Polis a haya un cuchiu di cushina. Fiscal ta haya cu intencionalmente Jason a tira mata su tata. Despues el a tira e arma afor den mondi. 26 Juni 2022, Polis a haya e arma y Jason a reconoce esaki. Fiscal a sigui bisa cu dia 13 December 2021 den e apartamento a haya 409 bala Caliber 22 rifle y 4 bala 9 mm.
Hues a bisa cu e caso ta hopi tristo. Jayson tabatin un relacion fastioso cu su tata. El a mustra cu psycologo y psychiater a mustra cu Jayson tin problema mental anti social. Nan ta haya cu e ta menos responsabel pa su actonan. Nan tin miedo cu si e no haya tratamento, e lo por bolbe haci mesun cos. Nan ta haya cu Jayson mester di un tratamento intensivo y largo. Nan ta recomenda tratamento obligatorio (TBS). Fiscal a exigi 10 aña di prison y TBS sin limite.
Hues a sera tratamento di e caso y a bisa cu dia 4 November 2022 lo tin sentencia.