Bishita recien di ATA y AAA a enfoca riba posibilidadnan concreto pa buelo non-stop Buenos Aires – Aruba
BUENOS AIRES– Cu e meta pa diversifica e mercado turistico di Aruba, siman pasa Aruba Tourism Authority como tambe Aruba Airport Authority a bishita Argentina. Durante e bishita, A.T.A. a pone enfasis riba e importancia di aviacion y cantidad di asiento aereo pa e mercado Argentino -cu te cu Mei di 2017- a conoce un crecemento di 63% di bishitante. E mercado di Argentina ta e di 6 mercado mas importante pa Aruba y a conoce un cantidad di bishitante record aña pasa, surpasando Brazil pa promer biaha. Ta wordo spera cu den 2017 Aruba lo ricibi mas di 24 mil bishitante Argentino y cu den 2018 lo ricibi aproximadamente 30 mil bishitante. Mihor conexion nan aereo y mas opcion lo brinda posibilidad pa sigui capitalisa di e mercado fuerte aki.
“Pa locual ta aña 2017, mas di 800 pasahero Argentino ta yega Aruba semanalmente cu buelonan di conexion. Buelonan semanal non-stop, for di entre otro Buenos Aires, ta como tal sumamente viabel, sigur y rendabel”, CEO di A.T.A. Ronella Tjin Asjoe-Croes, ta remarca tras di su bishita na Buenos Aires. Aki tabata tin un agenda marca pa encuentronan cu autoridadnan di e mundo di benta di biahe pa entro otro Aruba, y tambe tabata tin reunion cu Aerolíneas Argentinas. Combersacionnan cu Aerolíneas Argentinas tabata fructifero y a duna inicio na negosashonan cu por conduci na buelonan non-stop entre e dos paisnan.
Aerolíneas Argentinas ta bulando desde 1949 y desde 2014 a wordo adkeri 100% pa gobierno Argentino, un aerolinea stabiel cu ta bula mas di 56 destinacion rond mundo y ta consiti di un flota di aproximadamente 56 avion. E flota ta consisti di avionnan Boeing 737-300 y 737-800 pa buelonan regional. Pa buelonan intercontinental y distancianan largo esaki tambe ta consisti di ekiponan Airbus 330 y 340. Desde 2012 Aerolíneas Argentinas ta forma parti tambe di Skyteam, dunando pasaheronan mas beneficio- y recompensanan pa cu otro aerolineanan mundial ora di biaha.
E desaroyo positivo di e bishitante Argentino ta danki na aerolineanan latino americano cu rutanan pa Aruba. Aki por mira un dominio significante di e biahero Argentino cu ta 34.3% di tur pasahero di COPA Airlines, 18.8% di Aires/LATAM y 17.7% di Avianca Airlines. No obstante e demanda creciente pa Aruba di e mercado Argentino, actualmente e trayecto di biahe for di entre otro Ezeiza International Airport (Buenos Aires) y Aeropuerto Internacional Reina Beatrix ta uno cu ta rekeri transito na otro ciudadnan manera Bogota, Panama y hasta Miami. Esaki ta implica duracion di entre 13 pa 14 ora di biahe. Considerando e demanda Argentino pa e isla di Aruba, un buelo directo EZE-AUA di un duracion di aproximadamente 6.5 ora, naturalmente ta haci e propuesta di un buelo directo uno mas atractivo pa e consumidor Argentino.
E estadia di e bishitante Argentino, ta consisti di un averahe di 9.3 anochi riba nos isla, un averahe halto, compara cu p.e. bishitantenan di Merca (averahe di estadia di 6 anochi / 7 dia). 23% di bishitantenan Argentino ta ripiti nan bishita. Despues di Santo Domingo y Cuba, Aruba ta a destinacion cu ta ricibi mas bishitante for di Argentina, den Caribe. E destinacion popular di Cancun, Mexico ta ricibi mas bishitante cu Santo Domingo den e caso aki.
Cu e biahe exitoso pa Argentina y reunion cu entre otro Aerolíneas Argentinas, Aruba Tourism Authority ta enfatisa e importancia di keda evoluciona esfuerso di Aruba como un destino pa asina crea oportunidadnan nobo, sigui expande mercadonan cu potentcial y duna mas estimulo na Aruba su Turismo. Dialogo cu Aerolíneas Argentinas a bin ta tuma lugar pa varios luna y e encuentro ta continuacion di e negociacionnan. Un encuentro cu a bai hopi positivo. Partidonan lo sigui traha riba e posibilidad di buelo non-stop entre Argentina y Aruba.