ORANJESTAD – Iniciativa pa Desaroyo di Empresa Arubano (IDEA) como parti di e Ministerio di Asunto Economico, Comunicacion y Desaroyo Sostenibel conhuntamente cu nos partnernan ActionCOACH, MA Production Group, Santa Rosa, RBC Royal Bank y Departamento di Asuntonan Economico, Comercio y Industria ta organisando un proyecto pa e muchanan di entre 9 te cu 13 aña.
E nomber di e proyecto aki ta “Kid$ Biz Market”, y lo ta dia 3, 4, 5 y 7 oktober 2022. E proyecto aki lo dura 4 dia y e orario lo ta di 9:00 am te cu 12:15 pm. Entrada ta completamente GRATIS.
For di 28 februari 2018, IDEA a inicia e proyecto cu yama “Kidpreneur$ With Big Ideas” cu ta specialmente pa e muchanan cu ta bishitando e Traimerdianan na Aruba. Pa duna oportunidad na otro muchanan cu no ta bishitando Traimerdia, IDEA a dicidi di organisa un actividad di 4 dia pa nan, yena cu workshopnan cu por inspira nan pa den futuro nan por bira un comerciante. Na final di e proyecto, nan lo ricibi un certificado di participacion.
E contenido di e workshop ta lo siguiente:
- Get Kids started as Entrepreneurs;
- Tech Workshop: The Basics of Lighting & Sound;
- Kids Agripreneur in the Making;
- Financial Literacy: Earning;
- Financial Literacy: Saving;
- Creative Snack Making (Animal Day Edition);
- Creative Cards Making (Christmas Edition);
- Business Plan for Kids;
- Certification Award
E proyecto aki lo ofrece e muchanan educacion empresarial y lo yudanan reconoce oportunidadnan comercial. E lo siña e muchanan con pa gana placa dor di hasi actividadnan comercial for di un edad hopi jong usando nan mesun creatividad. E muchanan lo wordo stimula pa nan tin nan mesun negoshi den futuro.
E intencion ta pa e muchanan aki tambe por participa na e Christmas Shopping Bazaar cu lo wordo organisa den comienzo di december 2022 dor di Ministerio di Asunto Economico, Comunicacion y Desaroyo Sostenibel y IDEA, pa asina nan haya e oportunidad pa bende nan productonan cu nan mes a crea.
Pa por registra bo yiu pa participa, por manda nos un email na [email protected]. Nos lo manda tur informacion necesario pa registra. Cupo ta limita. Nos di IDEA ta desea tur e participantenan hopi exito cu e bunita proyecto di: “Kid$ Biz Market”.
Abo tin un Idea? Haci bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur informacion y guia necesario. Por sigui nos riba Facebook Page: @Idea-Aruba.