Cu un record nobo aña pasa, Aruba ta e di 3 pais cu mas bishitante Argentino den e mercado di Caribe
BUENOS AIRES– Den un tour relampago di 4 dia, Aruba Tourism Authority a bishita Argentina cu e meta pa diversifica e mercado turistico di Aruba. Durante e bishita, A.T.A. a pone enfasis riba e importancia di e mercado aki. E tour a cuminsa oficialmente diamars, dia cuatro di juli. Durante e bishita aki tabata tin intercambio cu diferente Tour Operators, Wholesalers di industria MICE (meetings, incentives, conferences & events), aerolineanan, companianan tecnologico y prensa/medionan di comunicacion Argentino.
E aña aki, Aruba a conoce un crecemento di 63 % di bishitante procedente di Argentina, te cu Mei di 2017. E estadia di e bishitante Argentino, ta consisti di un averahe di 9.3 anochi riba nos isla, un averahe halto, compara cu p.e. bishitantenan di Merca (averahe di estadia di 6 anochi / 7 dia). 23% di bishitantenan Argentino ta ripiti nan bishita. Despues di Santo Domingo y Cuba, Aruba ta a destinacion cu ta ricibi mas bishitante for di Argentina, den Caribe. E destinacion popular di Cancun, Mexico ta ricibi mas bishitante cu Santo Domingo den e caso aki. E Mercado di Argentina ta e di 6 mercado mas importante pa Aruba y a conoce un cantidad di bishitante record aña pasa, surpasando Brazil pa promer biaha.
Teniendo e infomacion nan aki na cuenta, Argentina ta produci un mercado significante y atractivo no solamente pa Aruba su turismo, sino tambe pa partnernan turistico na Argentina manera aerolineanan y Tour Operators. Ta wordo spera cu den 2017 Aruba lo ricibi mas di 24 mil bishitante Argentino y cu den 2018 lo ricibi aproximadamente 30 mil bishitante.
E bishita aki a wordo oficialmente encabesa door di Ronella Tjin Asjoe-Croes, CEO di A.T.A. Tambe presente ta Miriam Dabian, directora di A.T.A. Latinoamerica, Jerusha Rasmijn, directora di Aruba Convention Bureau, y Pablo Rodriguez, Director di A.T.A. Argentina. E delegacion di A.T.A. a consisti tambe di Jo-Anne Arends, representante di Aruba Airport Authority. Agenda tabata inclui un bishita na e cuidad di Rosario riba diamars. A sigui despues na cuidad di Cordoba ariba diaranson y na final, riba diahuebs y diabierna, a tene presentacion nan na Buenos Aires, rueda di prensa y reunionnan importante incluyendo e topico referente ampliacion di aviacion di Argentina. E bishita nan tambe a inclui participacion di varios socio turistico incluyendo hotelnan local, entre otro Barcelo Hotels, Divi Resorts, Hilton Aruba, Holiday Inn Aruba, Riu Hotels y De Palm Tours.
Cu e plannan menciona, A.T.A. a lansa un campaña asina yama “#Necesitas Aruba” den region Latino Amerciano. E campaña promocional a wordo activa na diferente pais di Latino America, incluyendo e mercado Argentino pa asina captiva e audiencia pa cu e producto Aruba via rednan social y tambe canalnan tradicional manera television.
Aruba Tourism Authority ta enfatisa riba e importancia di keda evoluciona riba esfuerso di mercadeo di Aruba como un destinacion multi facetico, explorando oportunidadnan nobo continuamente pa asina mantene, expande y diversifica Aruba su turismo.