Tur e trabou cu Gabinete Mike Eman I y II a ehecuta, demas di tur otro trabou di preparacion haci pa continuacion, riba e ramo di energia berde lastimamente a wordo frusta, para y/of destrui principalmente na man di prome minister Evelyn Wever-Croes. Pueblo por mira con un structura di maneho responsable y transparente pa garantiza produccion y suministracion di energia ta wordo manipula y destrui pa e partidonan MEP y RAIZ den gobernacion. E unico conclusion cu por saca como motivacion aki ta cu tin un sid pa poder y hamber pa enrikesemento di Friends & Family.
Durante 5 aña bou gabinete Wever-Croes a kita y/of remplasa dos (2) director di utilities Aruba NV, tres (3) director di WEB Aruba NV, dos (2) director di NV Elmar Aruba y tambe un total di 22 miembro di e conseho di comisario (RvC) di Utilities, WEB y Elmar. Esaki claramente ta prueba y indicacion di un maneho adhoc, sin vision y deficiente di gabinete MEP-RAIZ.
Un berguensa grandi pa mira con e dos ministernan – Evelyn Wever-Croes y Glenbert Croes cu sosten di fraction di MEP y RAIZ – tin ningun aprecio y valor pa nos profesionalnan Arubiano. Esaki ta un falta di respect total pa tur e trahadornan den nos companianan estatal y ful e pueblo di Aruba. Peublo mester realiza cu nos companianan estatal mester wordo respeta y protehe contra di abuso politico. Ta inaceptable cu ministernan di MEP y RAIZ por kere cu nan por kita profesionalnan for di posicion clave y di vital importancia pa economia di nos pais, pa despues gewoon pone familiares sin educacion algun y/of experencia al caso den e posicionan aki. Esaki ya ta causando un desaster den nos pais. E tipo di actuacion aki dor di gobernantenan mester wordo mira y trata como gobernante terorista! E actonan aki ta contra e interest general y ta demotivante pa tur e profesionalnan na Aruba. Esaki tambe ta un di e causanan cu hopi di nos hobenan arubiano no kier regresa nos pais.
Un gabinete di MEP-RAIZ cu ya tin NINGUN clase di authoridad moral. Un gabinete cu un falta di sentido propio pa goberna nos pais riba un manera responsable y digno. Kiko mas por spera di e gabinete MEP y RAIZ?