“Nos ta dos pais cu diferente status pero cu retonan similar, y ora bo para hunto bo por enfrenta e retonan miho”
ORANJESTAD – Prome Minister Evelyn Wever-Croes a ricibi bishita di Diputado di Boneiro señora Nina Heyer. Diputado Heyer tin 10 aña den politica enfocando principalmente riba tereno di pobresa, bienestar di comunidad y enseñansa. Diputado Heyer ta di bishita na Aruba pa atende un conferencia entre tur e 6 islanan di Reino Hulandes den Caribe riba e tema di enseñansa. Minister Endy Croes ta e persona encarga pa guia e conferencia aki.
Tumando e oportunidad di su bishita na Aruba, Prome Minister a reuni cu Diputado Heyer pa asina trata diferente punto di interes entre Aruba y Boneiro. Alavez a dialoga riba con e dos islanan aki lo por yuda otro. Prome Minister a indica cu Aruba y Boneiro ta dos isla cu diferente status pero cu ta enfrentando retonan similar y cu si para hunto lo por enfrenta e retonan aki miho.
“E reunion a bay hopi bon, nos a yega na palabracionnan cu den proximo dianan nos lo duna mas contenido na nan” Prome Minister a expresa.
