ORANJESTAD – Corte di Husticia a trata e caso penal cu Ministerio Publico a cuminsa contra e hoben homber P.K. (17), kende ta wordo acusa di posecion di arma di candela cu bala.
ARUBANATIVE por a compronde cu Hues a señala cu problema di gang ta pone turismo pa Aruba na peliger.
Durante tratamento di e caso P.K. a admiti di tabatin un arma di candela y bala. El a bisa cu el a busca esaki pa defende su mes. Ta asina cu durante su detencion den KIA, el a percura pa sigui su estudio y a gradua.
FISCAL
Fiscal a bisa Hues cu e ta haya legalmente proba cu P.K. a haci su mes culpabel pa posecion di arma di candela cu bala. Fiscal a bisa cu esaki ta un caso serio. El a mustra cu ultimo aña tabatin hopi caso di posecion di arma di candela y hasta caso di tiramento cu herido.
CASTIGO
Na opinion di Fiscal, por bien ta cu ainda P.K. no ta realisa ki peliger un arma di candela ta. Pa cu e castigo, Fiscal a bisa cu e ta tene cuenta cu P.K. ta un fist offender, esta promer biaha cu e ta cay den man di husticia y mester presenta dilanti Hues.
Fiscal a aplaudi e hecho cu P.K., apesar di ta sera den KIA, a sigui studia. Tambe Fiscal a tene cuenta cu P.K. kier haya guia di Reclasering.
Fiscal a exigi 360 dia di prison, kitando e 147 dia cu e ta sera y e resto, 213 dia ta bira condicional cu un tempo di prueba di 2 aña y esaki bao guia di Reclasering.
Esey ta nifica cu e mesun dia, P.K. ta sali liber.
PROBLEMA DI GANG UN MOLESTER
Hues a dicta sentencia di biaha. El a bisa cu e ta haya legalmente proba cu P.K. tabata den posecion di arma di candela y bala. A cumpra esaki pa defende su mes. Na opinion di Hues, tur esaki tin di haci cu problema di gang cu ta causa hopi molester na Aruba. Esaki ta trece turismo na peliger.
CASTIGO COMBINA
Hues ta haya e exigencia di Fiscal na su lugar. El a condena P.K. na 360 dia di prison, di cual 213 dia ta condicional cu un tempo di prueba di 2 aña y esaki bao guia di Reclasering.