Solito – Diabierna anochi algo pasa di 10:30 varios unidad di polis a sali pa un adres conoci na Solito, unda lo tawata tin problema grandi ariba caya.
Na yegada polisnan a bin compronde cu tawata trata di un problema entre bisiñanan. Un problema cu ya a bay for di man y no ta mustra di tin un solucion na horizonte.
Na e sitio nos a compronde cu den e caya aki, na un cas tawata tin un fiesta andando y e bisiña cu ta un conoci di polis no tawata na cas y ora e la yega e problema a start.
Segun informacion na e sitio, no ta prome biaha cu e bisiñanan problematico aki (e pareha conoci di polis) ta haci problema cu e otro habitantenan den e caya aki.
Diabierna anochi despues di algun tiramento di palabra awa a pasa hariña, y a start un bringamento. Aki un homber lo a ricibi algun mokete y parse un muhe a bay vloer durante pelea.
Segun e habitantenan di e caya aki problemanan den nan caya a start na aña 2020, na momento cu e persona aki y su pareha a bin biba eybanda.
Un bisiña a bisa polis di nan “experiencia” cu e persona aki, segun nan ta pasa busca problema cu tur hende den e bario.
Menasa di morto aparentemente tambe lo a cay, pero asina mes polis no a detene e buscado di problema conoci di nan.
Polis a papia cu ambos partido y a splicanan un biaha mas ariba e consecuencianan.
E problema a termina pa e diabierna aki, pero polis mes ta convenci cu lo bay tin mas problema.
