ORANJESTAD – Director di DOW Marlon Croes a elabora riba e situacion di mantencion di Fontijn nan cu tin den Oranjestad. Actualmente tin 3 fontijn, (1) Plaza Padu patras di Bestuurskantoor, (2) Plaza Daniel Leo, (3) situa entre Penha y La Moderna.
Fontijn Plaza Padu
E ekipo di luz y sistema di cashi di coriente a wordo vandalisa, consecuentemente e luznan no ta cende. Aworaki ta den proceso di haci mantencion grandi riba dje. A pidi piedranan nobo pa e fontijn y trabounan a cuminsa di remove e piedranan daña cu tabatin prome. Lamentablemente durante e periodo di mantencion e contratista a bira malo un tempo cual a trece algun tardansa, pero e siman aki nan a reanuda trabou. Ta calcula pa dentro di 1 pa 2 siman lo keda cla cu esaki. Ademas tin contratista atendiendo cu e cashi di coriente pa e luznan drenta den funcion bek.
Fontijn Plaza Daniel Leo
E fontijn aki tabata tin un problema mas grandi compara cu esun di Plaza Padu. Tabatin dos palma den baki na e fontijn, cu durante ultimo añanan a crece y bira grandi. Consecuentemente nsn a scheur e muraya di e fontijn, pues a transplanta e palmanan aki pa Bushiri. Asina mesora e trabounan di mantencion a cuminsa riba e muraya di e fontijn aki. trabou tin cu sigui pa drecha piedranan y tegels cu a daña pa cual a haci e pedido pa esakinan. Lamentablemente e piedranan cu mester pa e fontijn aki no ta disponibel aworaki na Aruba, pero manera cu ricibi esakinan lo reanuda e trabou pa finalise prome cu fin di aña. Mester menciona cu e cashi coriente y e luznan ta bon, pues manera cu materialnan cu falta yega, lo finalisa e trabou pa fin di aña e fontijn Plaza Daniel Leo ta den bon condicion.
Fontijn memey Penha y La Moderna
A tuma nota cu tin basta molester di e fontijn aki ora cu e ta den operacion vooral cu awa. Pa e motibo aki DOW a hacie ful bashi actualmente. E fontijn ta den planificacion pa mantencion grandi tuma luga na dje den curso di 2023. Pero considerando e situacion di molester, mester hiba discusion amplio den seno na DOW, cu gobierno y gremionan comercial, pa wak futuro di e fontijn aki y kico ta e mihor manera pa atende cu esaki. A haya diferente oido di diferente angulo cu ta indica pa mihor elimina e fontijn, pa motibo di e molester y pues lo evalua kico ta mas mihor.
Sr. Croes a expresa cu si elimina e fontijn pa via di e molester, esaki kiermen cu ta “give in” den e desaroyo di caya grandi den su totalidad. E otro opcion ta pa dreche y haci e trabounan necesario pa keda mantene den bon condicion y trece e atributonan cu ta mehora caya grandi por ehempel bon iluminacion, bon servicio di limpiesa, bon mantencion y mas wowo den caya, cu eorey e molester lo por wordo reduci.