ORANJESTAD – Awe henter mainta a bay na tratamento di e caso penal contra e hombernan J.G.G., A.V.R.(19), A.V.(24) y J.J.(19), kendenan ta sospechosonan den un caso di tiramento na Yaburibari.
ARUBANATIVE por a compronde cu Fiscal ta acusa nan di intento di asesinato y posecion di arma di candela. Fiscal ta acusa nan tambe di tabatin un of mas arma di candela entre 28 y 29 Maart 2022.
Fiscal a bisa cu J.J. tambe ta wordo acusa cu dia 4 Juni 2020 a dal un persona mokete na cara y cabez y kibra su bril. Tambe 10 October 2020 a maltrata dos otro persona cu mokete, boter y piedra.
HOMBER TIRA NA BUSHIRI
For di tratamento di e caso por a compronde cu dia 28 Maart 2022 den oranan di anochi, esnan di gang di Yaburibari lo a pasa den auto y tira e homber D. den pia na Bushiri. Esaki pasobra cu esnan di Bushiri lo a bati formal un miembro di e gang di Yaburibari. E tiramento aki a causa cu e gang di Bushiri a dicidi di tuma venganza pa D. y a bay pa tira na Yaburibari. Eynan tabatin un bashamento di bala pasobra esnan di Yaburibari tabata sa cu e gang di Bushiri lo bay tira y tabata warda nan. Tabatin tiramento riba e auto den cual e grupo J.G.G., A.V.R., A.V.(Pompolonchi) y J.J. tabata y di e grupo tabata tira bek. A haya impacto di bala riba e auto.
BASHA BALA NA YABURIBARI
Hues a bisa cu dia 29 Maart 2022, un tiramento a sosode na Yaburibari. Hues a interoga e chofer di e auto A.V.R. El a bisa cu tanto dia 28 como 29 Maart nan a bay Yaburibari y den e auto tabata J.G.G., A.V. y J.J. El a bisa cu A.V. y J.J. tabata arma y nan a bay na cas di A.B. Ta asina cu A.B. a mira nan y a bay paden. Nan a sigui pasa bay. Segun A.V.R., nan a bis’e pa bay Noord pa mira si ta topa J.A. Parce cu A.V. y J.A. lo tin problema cu otro. Nan no a mir’e. E ora ey a dicidi di bay cas. Su siguiente dia, 29 Maart 2022, nan a sali atrobe y na un supermercado na Yaburibari a mira J.A. a baha for di su auto. J.J. kier a tir’e pero door cu tin hende pafor di e supermercado, e no a tira. Un rato despues a pasa un auto sin lus sendi y J.J. a bisa pa sigui nan pasobra e auto ta parce esun cu a haci e drive by shooting na Bushiri. Nan a sigui su tras y J.J. a tira riba e auto.
Hues a mustra cu promer tabatin tiramento riba un Ford Escort blanco na altura di JZ Wheels. Den e auto lo tabata L.K. y A.M. cu lo ta di e gang di Yaburibari. Ora cu A.V.R. a bay Yaburibari y a para na cas di A.B., tabatin tiramento riba otro. Danki Dios ningun hende a resulta herida.
SOSPECHOSO TA ADMITI DI TIRA
Hues puntra J.G.G. si el a tira na Yaburibari. J.G.G. tabata sinta dilanti den e auto banda di A.V.R. El a bisa cu e no a tira. E tambe a bisa cu A.V. y J.J. tabata esnan arma y tabata sinta patras den e auto.
Hues a puntra J.J. kico a pasa. El a admiti di a tira 1 biaha na cas di A.B. Hues a bisa cu na Polis el a bisa cu e no tabata tin nada di haci cu e caso. El a bisa cu e, A.V.R. y J.G.G. tabata den e auto. El a bisa cu nan a tira promer y despues el a tira riba un persona. El a bisa cu e no sa kende A.B. y J.A. ta. Hues a bisa cu e ta sorprendi cu J.J. no sa pasobra anterior nan a bay busca J.A. Riba e preguntanan di Hues, J.J. a desmenti di ta forma parti di un gang. El a bisa cu e no tin nada di haci cu e tiramento na Bushiri. Segun Hues, e cos ta cu kier a tuma venganza di e tiramento na Bushiri. J.J. a bisa Hues cu A.V. no tin nada di haci cu e caso aki y no tabata den auto. Hues a puntra J.J. pakico e tabatin un arma cun’e. El a keda wak Hues pero no kier bisa nada. Despues di papiamento di Hues, na dado momento el a bisa cu e tin e arma pa defende su mes. Hues a puntra J.J. si e ta tapa pa A.V. pasobra e ta bisa cu A.V. no tin nada di haci pero A.V.R. y J.G.G. ta menciona cu A.V. tabata den e auto. J.J. a bisa Hues pa puntra A.V.R. y J.G.G. Hues a bisa cu e tin e impresion cu J.J. no ta papiando e berdad. J.J. a bisa cu e ta bisando e berdad.
SOSPECHOSO TA NENGA DI A TIRA
Hues a puntra A.V. si el a tira. A.V. a desmenti categoricamente di tabata den auto y a tira. El a bisa cu e conoce A.V.R. y J.G.G. pasobra A.V.R. sa graba musica p’e. El a bisa cu e no conoce J.J. Hues a puntra pakico A.V.R. ta menciona su nomber. Segun A.V., e no sa si ta pasobra A.V.R. tabata graba p’e, lo a menciona su nomber. Hues a puntr’e si e sa di e tiramento na Bushiri. El a desmenti y a bisa cu e ta biba na Hato. Hues a puntr’e si e tin arma of tabatin arma den su man. El a desmenti. El a desmenti di tabata envolvi den e tiramento den vecindario di JZ Wheels. E ta para riba cu e no tin nada di haci cu e casonan di tiramento. El a bisa Hues pa laga Recherche mira e camera na JZ Wheels y mira si e ta envolvi. El a bisa cu A.V.R. ta bisa cosnan y despues J.G.G. ta papia di otro cos. E no sa ki plan nan lo tin.
SOSPECHOSO MENAZA DEN KIA
Abogado mr. Croes di A.V.R. a puntra su cliente si el a wordo menaza varios biaha den KIA pa cambia su declaracion. Segun A.V.R. den KIA el a wordo menaza pa cambia su declaracion y menciona otro hende. Riba pregunta di abogado el a bisa cu J.J. y A.V. ta esnan cu a menaza.
MALTRATO
Hues a bisa J.J. lo a bringa cu grupo y e hombernan T. y V. a resulta herida. Esaki sosode October 2020. El a bisa cu e tabatin problema cu T. y V. E tabata hunto cu otro 3 riba bicicleta y a bay riba nan. J.J. a admiti di a forma parti den e pelea entre 2 personanan. 4 Juni 2020 e lo a maltrata e homber H. Esakinan sosode tempo ainda J.J. tabata menor di edad.
EXIGENCIA DI FISCAL
Fiscal a bisa Hues cu tur 4 sospechoso ta pa un caso hopi serio. E ta haya legalmente proba e tiramento. Na opinion di Fiscal, e caso aki ta relaciona cu problema entre grupo di Bushiri y esnan di Yaburibari. Parce cu a bati un miembro di gang di Yaburibari cu ta di J.A. 28 Maart 2022, D. a wordo tira den pia den oranan di anochi na Bushiri den un drive bay shooting. Door di esey e grupo di Bushiri kier tuma represaya. 29 Maart 2022, A.V., J.J., A.V.R. y J.G.G. a bay den auto maneha pa A.V.R. pa tira na Yaburibari. J.J. y A.V. tabata sinta patras. Nan a mira J.A. para na un supermercado y J.J. kier a baha pa tir’e pero door di mucho hende, no a haci’e. Despues a bay tira riba auto Ford cu ta auto di K. Segun A.V.R., ta J.J. a tira cu arma cu el a haya for di A.V. A haya impacto di bala den bumper patras cu a perfora auto y bay pega den asiento patras. 29 Maart 2022 anochi, e tiramento a sosode entre grupo di Bushiri y Yaburibari. A.V. y J.J. a tira riba cas di A.B. y a tira riba un Tercel berde den cual B. tabata core pa parti corant. Segun A.V.R., A.V. a bisa cu el a tira riba e Tercel. Segun nan, B. lo ta forma parti di e gang di Yaburibari. A.V. ta para riba cu e no sa nada di e tiramentonan y cu lo ta un plan a traha contra dje. Na opinion di Fiscal e declaracion di A.V. y J.J. no ta berdad y mester pone nan un banda. E ta haya cu A.V. y J.J. tabata kier mata J.A., A.B. y B.
Fiscal a bisa cu A.V.R. a declara cu A.V. a bisa e plan pa bay check e cas y despues ta tira J.A. Fiscal ta haya cu A.V.R. y J.G.G. ta complice di e intento asesinato. Pa loke ta e peleanan di caya di J.J., Fiscal ta pidi Hues pa declara J.J. liber di e pelea cu e hombernan T. y V.
CASTIGO
Fiscal a bisa cu e posecion di arma den hubentud ta alarmante. Ministerio Publico ta baha pisa pa posecion di arma, caminda ta exigi 2 aña di prison.
Pa loke ta e caso di tiramento na Yaburibari, el a bisa cu e auto di A.V.R. lo keda confisca pasobra el a wordo usa pa e tiramento. Fiscal a bisa cu e ta tene cuenta cu A.V.R., ta promer biaha cay cu e ta sera. Tambe cu el a coopera cu e investigacion y su edad hoben.
Fiscal a exigi 4 aña di prison di cual 6 luna ta condicional, cu un tempo di prueba di 3 aña. Fiscal a sigui cu J.G.G., kende tambe ta promer biaha cu e ta cay sera y tambe a coopera cu e investigacion. Fiscal a exigi e mesun 4 aña di prison, di cual 6 luna ta condicional cu un tempo di prueba di 3 aña.
Pa A.V., Fiscal a mustra cu na 2016, a condena A.V. pa maltrato y na 2019 a wordo condena pa intento mata. E ta haya cu e castigonan aki no a yuda trece cambia. Tambe el a cuestiona e hecho cu A.V. no kier para responsabel pa loke el a haci. Fiscal a exigi 10 aña di prison.
Pa J.J., Fiscal a bisa cu e no a tuma responsabilidad completo. El a exigi 7 aña di prison.
Despues di a scucha defensa di e abogadonan, Hues a bisa cu otro luna lo tin sentencia.