Departamento Recurso Humano (DRH) ta inicia un trayecto di un sistema yama “Prestatiemanagement” segun acuerdonan stipula den “Landspakket”
E meta tras di e sistema ta e desaroyo di e empleado publico pa asina mehora e calidad y eficiencia di e aparato gubernamental.
Gobierno di Aruba a duna DRH e mandato pa inicia e trayecto piloto di “Prestatiemanagement”. Den esaki a inclui participacion di e sindicatonan y nos empleadonan publico den su totalidad.
Pa implementa e Prestatiemanagement, a organisa un proyecto piloto na unda 38 departamento di Gobierno a participa exitosamente. Awor ta sigui cu información y workshop na e demás departamentonan di Gobierno.
E parti legislativo di e sistema, ta den desaroyo hunto cu DWJZ y pa asina e Prestatiemanagement drenta na vigor pa 1 januari 2023.
E siman di 12 pa 19 september 2022, DRH lo continua cu e proceso di preparación pa implementación di e sistema. E demas departamentonan di Gobierno lo ser invita pa atende un “Prestatiemanagement Workshop”, durante cual e departamentonan aki lo ricibi información y training riba e trayecto.
DRH lo mantene sector publico di Aruba informa di e desaroyonan den e proximo dianan, pa asina un y tur por adkiri mas conocemento di e sistema y asina aporta constructivamente tambe na e Proyecto “Prestatiemanagement”.
