Recientemente, den rueda di prensa semanal di Partido MEP, Lider di MEP a splica e vision di MEP pa cuido medico. Constantemente nos ta tende di casonan di cuido di salud cu ta hopi malo. Famianan cu ta pasa caminda di cruz pa haya diagnostico pa despues nan haya tratamento necesario. Recientemente, nos a tende di e caso di un mucha chikito kende cu despues cu e mayornan a cana un caminda di cruz, a bin resulta cu e mucha tin un malesa serio. Esaki ta un caso cu a kibra curazon di e pueblo. Sra Wever-Croes ta bisa:
“Pa e motibo aki, mi no ta cansa di ripiti. Na Aruba, nos cuido di salud ta hopi malo. Nos mester haci algo na esaki. Nos ta mira cuatro aña di Minister Visser cu unicamente tawata kier a “show off” pa saca potret.
Despues nos tin cuatro aña di Minister Schwengle cu unicamente ta pleita cu tur hende y kita profesionalnan pa asina pone su propio hendenan protegiendo asina e mercado pe mes y pa su grupito. Minister Schwengle no kier pa dokternan cu a studia den region bin studia na Aruba pasobra e mester protehe su puesto pa e tin trabou despues cu e baha como minister. Pa e motibo aki e no kier concurencia. Esaki ta decisionnan incorecto di e minister pa cu salubridad publico”.
Lider di MEP ta enfatisa cu Aruba no por sigui asina y cu nos mester haya bek e cuido di salud cu e pueblo merece.
“Partido MEP tin e compromiso aki cu e pueblo. Nos vision pa drecha cuido medico lo wordo realisa una bes nos drenta gobierno.
Prevencion.
Lo introduci chekeo medico obligatorio anualmente pa asina detecta malesanan na tempo. Ora cu malesanan, manera cancer, wordo detecta tempran, e tratamento lo bay mas facil y e costo di cuido medico lo baha tambe. Stichting BOB ta un bon ehempel di prevencion. Tin otro ‘screening’ nan cu tin posibilidad pa detecta mayoria di cancer cu nos ta haya hopi den nos comunidad. Nos no mester laga cancer toca na nos porta pa e ora cuminsa actua. Prevencion ta miho cu lamenta.
Brigada di Salud.
Pa mehora e calidad di cuido medico na Aruba, nos lo corta e tempo di espera pa asina cada pashent wordo atendi mas lihe posibel. Hopi ta puntra con MEP lo haci esaki. Pa cuminsa y si tin mester, lo trece un grupo di specialistanan y expertonan di exterior pa e tempo necesario pa yuda nos dokternan y despues cu e situacion wordo sanea, e grupo aki ta bay back y nos mesun dokternan ta sigui y mantene e tempo di espera cortico. Esaki ta loke mi kiermeen cu Brigada di Salud.
Corta tempo di espera.
No ta algo normal pa un pais desaroya manera Aruba warda te cu 7 luna of mas pa haci un operacion. Nos lo percura pa amplia e orario di operacion, inverti den nos enfermeronan, inverti den EPI cu tin salubridad y cuido den su curriculum. Asina nos por haya mas enfermeronan pa haci e trabou.
Di mes un manera, lo amplia e orarionan di haci test na Hospital pa asina nos por trece e cuido mas cerca di e pashent.
Ademas, MEP lo percura tambe pa bin cu centro medico den e arianan central di nos pais, cu ta Santa Cruz y Paradera. Imsan mester bira un hospital. Y asina nos por cuminsa duna e cuido di salud digno cu Aruba merece.
Esaki ta e compromiso di MEP pa e pueblo di Aruba. 22 di September, pone bo confiansa den mi persona y den Partido. Hunto nos lo logra e cambio cu e pueblo di Aruba ta pidi pe”.