Nieuw-Beijerlad,Zuid Holland, Hulanda:
Como 6 persona a perde nan bida y 7 persona a keda herida na momento cu un truck di carga a perde control baha for di caminda riba un dijk y a drenta den un buurtfeest (fiesta di bario).
Diasabra den oranan di atardi, un BBQ party cu lo mester a resulta den un fiesta alegre y cu tabata yen di ambiente, a caba den un drama hopi tristo.
E accidente serio aki a sosode den careda di 6’or di atardi, na momento cu e BBQ party tabata den full swing, hendenan sinta na mesa cla pa come of ya tabata comiendo. Segun un habitante cu ta bibando mas cu 40 anja den e bario aki, a comenta cu esaki ta algo hopi horibel, cu nunca nan a experiencia.
Na yegada di polis, brandweer,ambulance y trauma helicopter, polis mesora a cuminsa na cera e area y cuminsa cu un investigacion. E area a wordo completamente cera cu lona blauw.
E caminda riba e dijk a wordo cera den ambos direccion, tambe e sitio unda e accidente a tuma lugar a wordo cera cu e lintnan blanco cu cora. Den e dorp di Zuidzijde tabata scucha un bay bin di sirena y di trauma helicopter. Polis a percura pa esnan na e sitio y cu ta biba cerca mesora ricibi support di slachtofferhulp.
E chauffeur di e truck, un homber di 46 aña procedente di spanja, no tabata herida, pero a keda deteni pa ocasiona e accidente tragico aki. E truck a wordo confisca pa mas investigacion tecnico, te den oranan laat di anochi a takel e truck for di e sitio.
E motibo principal cu e chauffeur a baha caminda for di riba e dijk y a drenta den e fiesta cu su truck, cu tur e consecuencianan horibel, no ta conoci. Diadomingo den oranan di mainta polis a informa media cu e chauffeur no tabata bou influencia.
Den e accidente aki a muri tres miembro di un solo famia, tabata di e mama, un yiu homber y su casa cu tabata 8 luna na estado. Tata di un famia y miembro honorario di e club deportivo di Berkel & Rodenrijs tambe a fayece den e accidente aki. E homber di 62 aña aki, a laga su casa y tres yiu atras.
Polis y ministerio publico ta haciendo un investigacion profundo pa haya sa kiko ta e motibo cu e chauffeur di truck a ocasiona e accidente aki. Un Barbeque cu tabata un fiesta masha gezellig, a caba den un enorme drama tristo. Diadomingo durante dia relaciona cu e investigacion, a haci diferente testnan medico cu e chauffeur, a controla su sanger y tambe si e por a tuma cualke medicamento. Tambe ta investigando si na e momento di e accidente, e chauffeur tabata na telefon of di un forma of otro a wordo distrai. Muy probablemente e chauffeur lo mester presenta dilanti hues comisario dialuna.
Otro pregunta cu Hoofdofficier van justitie Hugo Hillenaar tabata puntra su mes, Kiko e chauffeur aki tabata haci riba e caminda di e dijk aki na Nieuw Beijerland, coriendo cu un truck sin carga, den un pueblo cu mas o menos 4 mil habitante so.
Hoofdofficier a bisa cu nan lo haci tur cos posibel pa e berdad sali na cla.
Segun un testigo, e chauffeur despues di e accidente a keda basta confundi. E testigo a conta cu e la mira cu e chauffeur di e truck diripiente a kita su mannan di e stuur y a primi gasolin. E testigo tambe tabata un invitado na e bbq party di e Ijsclub De Kom Zuidzijde. Na prome instante e testigo a nota cu e chauffeur ta tumando un bocht demasiado hancho, pero despues e la mira cu e truck a baha di e dijk drenta den e fiesta. E testigo a sigui comenta cu despues di e accidente tabata ta un chaos total. Varios hende a bay pega bou di e truck, tambe tabata tin mucha entre nan. E tabata algo gewoon horibel. Mesa. tayo, cups, stul, hende a bay halto. Na e barbeque tabata tin como 50 persona. E tabata un BBQ party di e ijsclub, e tabata un fiesta di despedida di e presidente di club, cu a cuminsa mas trempan den oranan di merdia cu un canoe trip y caba cu e BBQ party.
