ORANJESTAD – Otro luna Corte di Husticia ta sigui trata e lamentable caso di tira mata di Sharury. Esaki despues cu na Juli 2022, Hues a habri bek investigacion riba e sospechoso Izak Principaal.
ARUBANATIVE por a compronde cu siman pasa via video conference, Hues a bisa den Corte mientras cu Izak Principaal tabata den KIA, cu via mail a papia cu psychiater di Hulanda kende a palabra 14 September 2022 e lo por ta disponible pa trata e caso. Hues a fiha 14 September 2022 pa trata e caso y abogadonan y Fiscal ta di acuerdo. Den sala di Corte tambe tabata presente, tata di e victima.
PSYCHIATER LO PAPIA FOR DI HULANDA
Hues a bisa cu tratamento di e caso lo tuma lugar 14 September 2022 y e psychiater di Hulanda lo participa via video conference. Hues a bisa cu lo scucha e psychiater su splicacion pa cu Izak Principaal y tambe lo contesta preguntanan cu lo por tin. Despues lo tin oportunidad pa Fiscal duna su punto di bista y abogadonan tambe.
HABRI INVESTIGACION
Dia 8 Juli 2022, Hues a tuma un decision tempran den e lamentable caso di tira mata Sharury (19) riba 4 Juni 2021. Ta asina cu ta acusa tanto Izak Principaal hunto cu Zuriel Celaire di un serie di delito. Esun di mas serio tabata e lamentable caso di 4 Juni 2022Fiscal a exigi 11 aña di prison pa Izak mientras cu pa Zuriel el a exigi 6 aña di tratamento obligatorio sera di un institucion.
Dia 8 di Juli 2022, Hues a bisa cu e ta habri e investigacion bek pa Izak. Hues ta haya cu e no tin suficiente informacion pa cu e hechonan y si Izak ta responsabel of menos responsabel pa su actonan. Hues a sigui bisa cu e kier informacionnan bon pa asina por dicidi si ta bay usa e ley penal pa adulto of e ley pa hubentud pa condena Izak.
RAPORT DI PSYCHIATER TA LAGA DI DESEA
Hues a mustra cu evaluando e caso, el a constata cu e raport di psycologo ta mustra cu Izak no ta responsabel pa su actonan. Hues ta haya bon motiva di psycologo cu mester aplica e ley di adulto y pone Izak na disposicion di Gobierno (TBS).
Sinembargo, Hues ta mustra cu psychiater su evaluacion ta laga na desea. El a mustra cu Psychiater ta haya Izak culpable pasobra ta Izak mes a bay haci’e. Hues no ta haya esaki suficiente splica. Tampoco Hues ta haya suficiente splica e conclusion di psychiater.
Pesey a busca asistencia di e psychiater di Hulanda y dia 14 September 2022 e tratamento di e caso penal ta sigui.